Oralda Assyl Dombyra respýblıkalyq aıtysynyń irikteý kezeńi márege jetti

ORAL. QazAqparat – H.Bókeeva atyndaǵy oblystyq qazaq drama teatrynda Táýelsizdiktiń 30 jyldyǵy aıasynda aqyn Júrsin Ermannyń 70 jasqa tolýyna arnalǵan ASSYL DOMBYRA respýblıkalyq aıtysynyń úshinshi irikteý kezeńi márege jetti, dep habarlaıdy QazAqparat tilshisi.

Qadyr Myrza Álı atyndaǵy oblystyq mádenıet jáne óner ortalyǵy men «ASSYLTAS» qoǵamdyq qorynyń uıymdastyrýymen, Batys Qazaqstan oblysy ákimdigi mádenıet basqarmasynyń qoldaýymen karantındik talaptarǵa sáıkes kórermensiz ótken saıysqa respýblıka óńirlerinen 14 aqyn qatysyp, baq synady.

Halyqaralyq aıtys aqyndary men jyrshy-termeshiler odaǵynyń tóraǵasy Júrsin Erman júrgizgen dodada bul joly Rınat Zaıytov, Aıtbaı Jumaǵulov, Erkebulan Qaınazar, Qanat Myrzahan, Ershat Qaıboldın, Raı Dóńbaev, Abzal Maqash, Bek Shmat, Nurzat Qarý, Syrym Ádilbek, Serik Qýanǵan, Tilegen Ádilov, Aınabek Bısenǵalıev, Baýyrjan Shırmedınuly sahnaǵa shyqty.

Qazylar alqasynyń tóraǵasy, belgili qalamger, Qazaqstan Jazýshylar odaǵy basqarmasy tóraǵasynyń orynbasary Mereke Qulkenovtiń aıtýynsha, aıtys joǵary deńgeıde ótti.

«ASSYL DOMBYRA» aıtysyn Táýelsizdiktiń 30 jyldyǵyna oraı uıymdastyrylǵan úlken baǵdarlama dep esepteımiz. Aq Jaıyqtaǵy aıtysqa Rınat Zaıytov sııaqty myqty aqyndar keldi. Batysqazaqstandyq Baýyrjan Shırmedınuly da jaqsy aıtysa bildi. Osynyń ishinen úzdik shyqqandar fınalǵa joldama aldy. Belgili metsenat, «ASSYLTAS» qoǵamdyq qorynyń prezıdenti Dýlat Tastekeıdiń demeýshiligimen ótip jatqan aıtys bıyl kúzde onyń týǵan jeri Aqsýat aýylynda qorytyndylanady», dedi Mereke Qulkenov.

Aıtysqa qatysýshylardyń bárine «ASSYLTAS» qoǵamdyq qorynyń atynan alǵyshattar men aqshalaı syılyqtar tabys etildi.