Oralda áskerı orkestr maıdangerdiń úıiniń aldynda ánder shyrqady

ORAL. QazAqparat - Oralda Ulttyq ulan jaýyngerleri 104 jastaǵy maıdanger, otstavkadaǵy polkovnık Semen Danılındi Jeńis kúnimen quttyqtady, dep habarlaıdy QazAqparat tilshisi.

«Batys» óńirlik qolbasshylyǵynyń baspasóz qyzmetinen túsken málimetke qaraǵanda, 9 mamyr kúni tańmen maıdangerge úıiniń aldynda Ulttyq ulan jaýyngerleri ánmen sálem berdi.

Aldymen sarbazdardyń balalary 5517-áskerı bóliminiń orkestrimen birge «Pradedýshka» ánin shyrqady. Sodan keıin orkestr áskerı bólimniń jeke quramymen birge «Katıýsha», «Jeńis kúni» sekildi ánderdi áýeletti. Bul ánderge Semen Akımovıchtiń ózi de qosyldy.

Ardagerdi «Batys» óńirlik qolbasshysynyń tárbıe jáne áleýmettik-quqyqtyq jumystar jónindegi orynbasary, podpolkovnık Baqyt Alazov pen ardagerler keńesiniń tóraǵasy, zapastaǵy podpolkovnık Baqytjan Berdıev quttyqtap, gúl shoǵy men syı-sııapattaryn tabys etti.

Maıdanger óziniń jaýyngerlik joly týraly áńgimelep berdi.

Reseıdiń Kýrsk oblysynda dúnıege kelgen S.Danılın soǵysty 1942 jyly Brıansk áskerı-saıası ýchıışesiniń kýrsanty bolyp bastap, 143-gvardııa mınomet polki quramynda batalon komandıriniń saıası jumystar jónindegi orynbasarlyǵyna deıin kóterildi.

Stalıngrad, Kýrsk ıini, Dnepr, Ýkraına, Polshada keskilesken urystarǵa qatysqan maıdanger jeńisti Kenıgsbergte qarsy aldy.

Soǵystan keıin S.Danılın Almaty, Qaraǵandy qalalarynda ishki ásker quramynda qyzmet etti. Qazirgi kezde qyzy Tatıananyń qolynda turady.

Ulttyq ulan jaýyngerleri bul kúni, sondaı-aq taǵy bir maıdanger, tarıhshy-ǵalym, otstavkadaǵy kapıtan Pavel Býkatkınniń úıinde boldy.

Aıta keteıik, Jeńis kúnine arnalǵan sharalar Oral qalasy men oblystyń barlyq aýdandarynda ótti.