Oralda aqyn Janǵalı atyndaǵy oqyrman bólmesi ashyldy

ORAL. QazAqparat - Búgin Qadyr Myrza Álı atyndaǵy mádenıet jáne óner ortalyǵynda belgili aqyn, Qazaqstan Jazýshylar odaǵynyń múshesi Janǵalı Nábıýllın (1936-2015) atyndaǵy oqyrman bólmesi men múmkindigi shekteýli zaǵıp jandarǵa arnalǵan kitap buryshy ashyldy, dep habarlaıdy «QazAqparat» HAA tilshisi.

Atalǵan bólmede Janǵalı aqynnyń kózi tirisinde tutynǵan buıymdaryna qosa jeke kitaphanasynan alynǵan 1130 kitap sórege qoıylǵan. Sonymen qatar oblystyq zaǵıp jáne kózi nashar kóretin azamattarǵa arnalǵan arnaýly kitaphanadan ákelingen «Braıl» jáne kitaptyń dybystalǵan nusqalary ornalastyrylǵan.
 

Ashylý rásimi «Jaıyqtyń Janǵalıy» atty ádebı-mýzykalyq sharaǵa jalǵasty. Janǵalı Nábıýllınniń shyǵarmashylyǵyn zerttep, monografııa jazǵan aqyn, ustaz Talap Taımasuly, ardager jýrnalıst Tıhon Álipqalıuly estelikterimen bólisip, rııasyz pikirlerin bildirdi.
 

Aqynnyń jary Aǵıba Ǵınaıatqyzy Janǵalı Nábıýllınniń sońynda mol mura qalǵanyn, sonyń bir bóligi - ózi ómir boıy jınaǵan kitaptaryn Qadyr ortalyǵyna qoıý usynysyn qabyl alyp, uıymdastyrǵan osy mekeme dırektory Baýyrjan Halıollaǵa shynaıy alǵysyn jetkizdi.

Shara barysynda aqyn óleńderi oqylyp, ánder oryndaldy.
 

Aıta keteıik, aqyn Janǵalı Nábıýllın 1936 jyly 13 jeltoqsanda qazirgi Bókeı ordasy aýdany Uıaly aýylynda dúnıege keldi. Oral pedagogıkalyq ınstıtýtyn bitirgennen keıin aýdandyq, oblystyq jáne respýblıkalyq basylymdarda qyzmet atqardy, Qazaqstan Jazýshylar odaǵynyń keńesshisi de boldy. Tyrnaqaldy óleńderi 1961 jyly «Jas dáýren» ujymdyq jınaǵyna ense, keıin «Aq jańbyr», «Tanys áýender», «Aq sóıle, júregim!», «Orda - qaharmandar qalasy», «Qasqaǵym», «Jyrlaıdy jyldar», «Joǵary kerneý», «Jetinshi perne» kóptomdyǵy jáne basqa kitaptary jaryq kórdi. Aq Jaıyq óńirinde qalam ustaǵandardyń bárine derlik ustaz bola bilgen J.Nábıýllın - Oral qalasy, Jańaqala jáne Bókeı ordasy aýdandarynyń qurmetti azamaty. Onyń óleńdegi alǵashqy qadamyn Ábdilda Tájibaev, Ǵafý Qaıyrbekovter joǵary baǵalap, sáttilik tilese, keıin ózi syılas, syrlas bolǵan Qadyr Myrza Álı «Osy jurt Janǵalıdy bile me eken?», dep «Jas Alashqa» maqala jazyp, jar saldy. Sondyqtan Qadyr ortalyǵynda Janǵalı bólmesiniń ashylýy da zańdylyq. Ótken jyly J.Nábıýllınniń týǵanyna 80 jyl tolǵanymen, onyń mereıtoıy oblys kóleminde atalmaı qalǵan bolatyn. Búgin sol olqylyqtyń orny sál de bolsa tolǵandaı kórindi.