Oralda aqyn Baýyrjan Halıollanyń jańa kitaby tanystyryldy

ORAL. QazAqparat -  H.Bókeeva atyndaǵy Batys Qazaqstan oblystyq qazaq drama teatrynda aqyn, Qazaqstan Jazýshylar jáne Jýrnalıster odaqtarynyń múshesi, «Eren eńbegi úshin» medaliniń ıegeri Baýyrjan Halıollanyń «Jan tebirenis» atty jańa kitabynyń tanystyrylymy boldy, dep habarlaıdy «QazAqparat» tilshisi.

Syrym aýdanynda kindik qany tamyp, Oraldaǵy daryndy balalarǵa arnalǵan mamandandyrylǵan S.Seıfýllın atyndaǵy №11 oblystyq mektep-ınternaty kesheninde bilim alǵan Baýyrjan Halıolla keıin Alataý bókterindegi ál-Farabı atyndaǵy QazMUÝ-dyń jýrnalıstıka fakýltetinen túlep ushty.

Elge aıtyskerligimen de keńinen tanylǵan, qazirgi kezde Oraldaǵy Qadyr Myrza Álı atyndaǵy mádenıet jáne óner ortalyǵynyń tizginin ustap otyrǵan aqynnyń buǵan deıin ár jyldary «Jumbaq qyzdyń janary» («Jazýshy baspasy), «Názik bult kóship barady», «Juldyz jaýǵan jaryq tún» (ekeýi de Oral qalasynda basyldy) atty kitaptary jaryq kórse, jańa jyr jınaǵy Almatydaǵy «An Arys» baspasynan shyqty.

Kitaptyń tusaýyn belgili jazýshy, Memlekettik jáne halyqaralyq M.Sholohov atyndaǵy syılyqtyń laýraty Sábıt Dosanov kesip, júrekjardy lebizin bildirdi. «Talantty adam qaı salada da talantty. Baýyrjannyń aldymen aıtyspenen aty shyqty. Keıin jańa qyrynan kórinip, jazba poezııada óz qoltańbasy bar ekendigin dáleldedi. Júrek qylyn shertetin óleńderi az emes. Bolashaqta da óz baǵytynan taımaı, qulashyn budan da keńge sermep, ár taqyrypta kólemdi týyndylar jazýyna tilektespin», dedi S.Dosanov.

Oblys ákiminiń orynbasary Ǵabıdolla Ospanqulov óńir basshysy Altaı Kólginovtiń atynan Baýyrjan Halıollany jańa kitabynyń jaryqqa shyǵýymen quttyqtap, shyǵarmashylyq jolda tyń tabystarǵa jete berýine tilektestigin bildirdi. Sharaǵa sondaı-aq Atyraý oblysynyń delegatsııasy arnaıy kelip, kórshiles óńirdiń basshysy Nurlan Noǵaevtyń sálemin jetkizdi.

Aqyn, jýrnalıst Talant Arǵynǵalı júrgizgen kesh barysynda Baýyrjan Halıolla óz óleńderin oqyp, jurtshylyqtyń rızashylyǵyna bólendi. Baýyrjannyń taǵy bir qyry - óz jyrlaryna án jazatyny. Onyń ánderin Ernar Ómiráli, Dastan Esentemirov, Farhat Orazov syndy Aq Jaıyq óńiriniń tanymal ónerpazdary oryndap, kórermender kóńiline jol taba bildi.