Oralda «Abaı» manevrlik turaqtaý pýnkti sýǵa túsirildi
Saltanatty rásimge qatysqan oblys ákimi Ǵalı Esqalıev osy erekshe kemeni bir jylda qurastyryp shyǵarǵan «Oral «Zenıt» zaýyty» AQ ujymynyń eńbegin atap ótti.
«Elimizdiń qorǵanys qabiletin nyǵaıtý baǵytynda sý yǵystyrylymy 500 tonnadan asatyn manevrlik turaqtaý pýnktiniń mańyzy zor. Bul Kaspıı teńizinde kemeler men katerlerdiń qyzmetin tıimdi uıymdastyrýǵa múmkindik beredi. Sol sebepti zaýyt ujymyna, osy kásiporyndy otyz jyldan astam ýaqyt boıy basqaryp kele jatqan Vıacheslav Valıevke alǵysymdy bildiremin. Qazirgi tańda zaýytta 900-deı jumysshy bolsa, sonyń 150-deıi – jas mamandar. Ótken ǵasyrdyń sekseninshi jyldary munda tórt myńdaı adamnyń eńbek etkeni belgili. Aldaǵy ýaqytta jumysshy-qyzmetkerlerdiń qatary tolyǵa túsedi dep senemiz. Bıyl Úkimet tarapynan jasalǵan qoldaýdyń nátıjesinde tek «Zenıt» zaýyty ǵana emes, sondaı-aq «Batys Qazaqstan mashına jasaý kompanııasy» AQ, «Gıdroprıbor» ǴZI» AQ memlekettik qorǵanystyq tapsyrystar aldy. Bul – úlken kómek», dedi óńir basshysy.
QR UQK Shekara qyzmeti dırektorynyń birinshi orynbasary Aıdar Aımýrzınniń aıtýynsha, budan buryn zaýyt shyǵarǵan 30 kater, kemeler Kaspıı teńizinde óz qyzmetterin múltiksiz atqaryp keledi. Bıyldyń ózinde tórt aıdyń ishinde solardyń qatysymen 41 kemedegi zańbuzýshylyq anyqtaldy. Tabıǵatqa 1 mlrd astam teńgeniń zalalyn keltirýdiń joly kesildi. Eger buryn kemeler senimdiligimen, jyldamdyǵymen erekshelense, endi olar arnaıy turaqqa qol jetkizdi. Kóp uzamaı Kórik eldi mekeninde oryn tebetin manevrlik turaqtaý pýnkti kemelerdi janar-jaǵar maımen, azyq-túlikpen qamtamasyz etedi. Sondaı-aq júze alatyn pýnkt zákirmen teńizge de ornalasa alady.
«Bul turaqtaý pýnktine Abaıdyń 175 jyldyǵyna oraı uly aqynnyń esimin berý uıǵaryldy», dedi A.Aımýrzın.
«Zenıt» zaýytynyń dırektory Vıacheslav Valıev kásiporynda sondaı-aq «Qaısar» jáne «Aıbar» dep atalatyn katerlerdiń qurastyrylyp jatqanyn da jetkizdi.
Eske sala keteıik, budan buryn «Zenıt» zaýytynyń birinshi dárejeli Otan soǵysy ordenimen marapattalǵan Qazaqstandaǵy jalǵyz kásiporyn ekendigin jazǵan bolatynbyz.
Sýretterdi túsirgen - Rafhat Halelov