Oralda 80-ge jýyq bala at sportymen aınalysyp júr
Batys Qazaqstan oblystyq «Báıge» federatsııasy uıymdastyrǵan jıynǵa aýdan ákimderiniń orynbasarlary, qalalyq, aýdandyq sport bólimderi jáne klýbtarynyń basshylary, federatsııanyń ár aýdandaǵy ókilderi qatysty.
Otyrysty ashqan oblystyq báıge federatsııasynyń prezıdenti Berik Esenǵalıev óńirdegi at sportynyń damýyna mán berip, ata-babamyzdan qalǵan dástúrdi jańǵyrtyp, jalǵastyrý arqyly jas urpaqty otansúıgishtikke tárbıeleýge bolatynyna, deni saý ulttyń qalyptasýyna at sportynyń paıdasy zor ekenine toqtaldy. Osy baǵyttarda birlese, keshendi túrde jumys jasaýǵa jáne jergilikti bılik ókilderin at sportyn qoldaýǵa shaqyrdy.
Jınalǵandar is-shara barysynda «Oral» sport klýby at sporty bóliminiń jumysymen tanysty. Aıta ketetin jaıt, atalmysh bólim atbegi, jeke kásipker Aqylbek Ishanovtyń bastamasy negizinde, Oral qalasy ákimdiginiń qoldaýymen osydan bir jyl buryn ashylǵan bolatyn.
Búginde munda 80-ge jýyq bala at sportynyń tórt túri boıynsha jattyǵady. Bólim jumysy týraly qalalyq dene shynyqtyrý jáne sport bóliminiń basshysy Artýr Sherǵalıev, sport klýbynyń dırektory Esqabyl Jalmýrzıev jáne jattyqtyrýshy Aqylbek Ishanov baıandady.
Bul bólimniń ereksheligi – at sportyna balany 10 jastan bastap úıretip júrgen elimizdegi alǵashqy mektepterdiń biri. Dál osy tájirıbeni engizgen olar at sporty boıynsha jasy kishi balalarmen de jumys jasaýǵa bolatynyn tilge tıek etti. Aldaǵy ýaqytta mundaı bólimder aýdandarda da ashylsa, balalarǵa tájirıbe almasý úshin múmkindikter týatynyn aıtty.
Keıin jınalǵandar jas palýandardyń aýdaryspaq jáne kókpar boıynsha jarystaryn tamashalady.
Dóńgelek ústel otyrysynyń ekinshi bólimi oblystyq aýyl sharýashylyǵy basqarmasynyń májilis zalynda jalǵasty. Bul jerde federatsııanyń ár aýdandardaǵy ókilderi tanystyrylyp, qujattary tabystaldy. Keıin federatsııanyń atqarýshy dırektory Satqalı Baızýllın federatsııa atqarǵan jumystar men keleshek josparlarǵa, báıge erejesi, báıgetóbe jáne báıge alańdaryn jasaqtaý talaptaryn saqtaýǵa toqtaldy. Ásirese, aýdan aýyldarynda ótetin báıgelerdiń erejege saı ótýin, jarna máselesi, báıge túrlerindegi shaqyrymdar men olardy ótkizý merzimderin qadaǵalaý qajettigin aıtty. Munyń barlyǵy júırikterdi qaýip-qaterden meılinshe saqtaý, olardy birneshe ret báıgege qosýǵa múmkindik berý úshin jasalatynyn jetkizdi.
Almatylyq atbegi, qoltýma jylqylardyń janashyry, «Qazaq Golden Steed» JShS prezıdenti Ertileý Satybaldy batysqazaqstandyqtardyń ulttyq at sportyna janashyrlyǵy úshin rızashylyǵyn bildirdi. Ol geografııalyq ornalasýy men aýa raıynyń mezgildik klımatynyń saqtalýyna sáıkes oblysty báıge ortalyǵyna aınaldyrýǵa qolaıly dep esepteıtinin, óńirde at sportyna qyzyǵatyn jas býyn qalyptasyp kele jatqanyn erekshe atap ótti.
E.Satybaldynyń oıynsha, kez kelgen salaǵa ǵylym aralaspasa damymaıdy. Osy oraıda ózi bas bolyp júrgen qoltýma jylqylardy qujattandyrý máselesi kún tártibinen túspeýi tıis. Sebebi táýelsizdik alǵaly elimizge kirgen qandy jylqylardyń sanynda esep joq. Al olardan týǵan, Qazaqstannyń otandyq ónimi bop esepteletin arǵymaqtardyń esebi, qujattary áli kúnge bir izge túspegen.
«Sondyqtan jylqyny asyldandyrýǵa, ony tájirıbeden ótkizý jáne satý máselesine beı-jaı qaraýǵa bolmaıdy. Biz tarıhqa úńilsek, babalarymyz arǵymaqtyń asylyn mingenin kóremiz. Mine, solardyń izin jalǵaý, qazaqtyń asyl tuqymdy jylqylaryn álemge tanytý úshin qoltýmalardy qoldaýdyń mańyzy zor», - dedi atbegi.
Jıyn sońynda oblystyq federatsııa men «Qazaq Golden Steed» JShS ózara memorandýmǵa qol qoıyp, aldaǵy ýaqytta birlesip jumys jasaýǵa kelisti.
Eske sala keteıik, budan buryn Oralda alǵash ret ulttyq sport túrlerinen ákeler men balalar arasynda jarys ótkenin jazǵan bolatynbyz.