Oralda 180 páterlik jańa úı paıdalanýǵa berildi
Onyń ashylý rásimine qatysqan Oral qalasynyń ákimi Abat Shynybekovtiń málim etkenindeı, Elbasynyń bastamasymen qabyldanǵan «Nurly jer» baǵdarlamasy birneshe jyldan beri sátti júzege asyrylyp keledi.
Memleket basshysy Qazaqstan halqyna arnaǵan ótken jylǵy Joldaýynda turǵyndardy qoljetimdi baspanamen qamtýdyń mańyzdylyǵyn atap kórsetken bolatyn. Osyǵan oraı halyqty jaıly qonyspen qamtý, ınfraqurylymdardy tartý jergilikti atqarýshy organdarǵa júktelgen edi.
«Qıyndyqtarǵa qaramastan, ótken jyl tabysty boldy deýge tolyq negiz bar. Oral qalasynda 7 kópqabatty turǵyn úı iske qosyldy. Mine, budan birneshe jyl buryn bos jatqan jerde úlken turǵyn úı kesheni boı kóterdi. Jeke ınvestorlar esebinen osy mańda 900 oryndyq mektep salynatyn bolady.
Balalar men jasóspirimder sport mektebiniń qurylysy kózdelýde. Aýlalardy abattandyrý, sport alańdaryn, demalys oryndaryn salý jumystary júrgiziledi. Jańa úılerdegi páterler turǵyn úı qurylys jınaq banki salymshylaryna jáne kezekte turǵan azamattarǵa berilýde», dedi Abat Abaıuly.
Zachagan kentinde boı kótergen turǵyn úıdiń merdigeri – «Altaır-SK7» JShS. Jalpy alańy 10609,50 sharshy metr úıdiń 54-i – bir, 81-i – úsh, 45-i – úsh bólmeli páterler. Ár sharshy metrdiń naqty quny 166055 teńge bolǵanymen, ol turǵyndarǵa 140 myń teńgege túsip otyr. 26055 teńge jergilikti bıýdjet esebinen óteledi.
Eske sala keteıik, budan buryn Oralda jańa jyl qarsańynda 216 otbasynyń baspanaly bolǵanyn, modýldik ınfektsııalyq aýrýhananyń paıdalanýǵa berilgenin jazǵan edik.