Oralda 13 adamǵa 56,5 mln teńge zalal keltirgen áıel sottaldy
BQO boıynsha ekonomıkalyq tergep-tekserý departamenti basshysynyń orynbasary Nurbol Rahmetovtiń málim etkenindeı, Oral qalasynyń turǵyny qarjy pıramıdasyn ınvestıtsııalyq uıym retinde tanystyryp, paıda tabýdyń eki baǵytyn ustanǵan.
Nurbol Joldasulynyń sózine qaraǵanda, salymshylarǵa qarajatty Vista shottary arqyly ınvestıtsııalaý shetel valıýtasyndaǵy depozıttik shottar qaǵıdasy boıynsha jınaqtardan paıda alýǵa múmkindik beredi dep sendirgen.
Ekinshiden, 10 jylǵa deıin bólip tóleýmen páterdi odan ári satyp alý úshin shottaǵy aqshany únemdeýge bolady delingen.
«Hermes Managament Ltd»-niń eń az ınvestıtsııa somasy aqshany depozıtke salý kezinde 1100 eýro bolǵan, shetel valıýtasyna salynǵan somadan 20 paıyz jyldyq mınımaldy tabys usynylǵan.
Sondaı-aq isker azamattarǵa jańa ınvestorlar tartý arqyly tabys tabý usynylyp, osylaısha dırektor deńgeıine jetkennen keıin aıyna 1000 eýrony quraıtyn turaqty jalaqysy men VISTA shottaryndaǵy barlyq depozıtterden 2 paıyzdan 18 paıyzǵa deıingi passıvti kiris qamtamasyz etilgen.
«Osynyń bári zańsyz uıymnyń qyzmetine oń áserin tıgizip, oǵan 42 adam tartylǵan. Sonyń ishinde 13 azamatqa 56,8 mıllıon teńge múliktik zalal keltirildi. Sottalǵan A-nyń zańsyz jolmen tapqan qarajatyna elordadan satyp alynǵan páteri sot úkimine sáıkes azamattarǵa keltirilgen zalaldy óteý retinde paıdalanylatyn bolady», - deıdi N.Ahmetov.
Sol sekildi K. degen áıel taǵamdyq qospalar men basqa da dárilik zattardy ázirleýge arnalǵan qarajatty qarjylandyrýdy jáne olardy satýdan depozıt somasynan paıyzdyq mólsherde paıda alýdy usynǵan ınvestıtsııalyq uıymnyń atyn jamylyp, zańsyz áreketterdi uıymdastyrǵan.
Jańa ınvestorlardy tartyp, qosymsha qarajatty ınvestıtsııalaý úshin aı saıynǵy syıaqy alýǵa múmkindik beretin yntalandyrýshy mansap satysy ázirlendi. Mysaly, bes jeke deńgeıdiń birine qol jetkizý úshin 3,5 mln teńgeden 55 mln-ǵa deıingi somaǵa qarajat salý qajet, soǵan sáıkes 0,03 paıyzdan 0,5 paıyzǵa deıingi ınvestıtsııalyq bonýs tólengen.
Investorlarǵa tabys pen senim uıalatý úshin satyp alynǵan kólikter, jyljymaıtyn múlikter men shetel saparlarynyń fotosýretteri bar joǵary kiristi kórsetetin úgit-nasıhat jumystary belsendi júrgizilgen.
«Tartylǵan ınvestorlardyń jalpy sany 185 adamǵa jetip, onyń 150-ine 211 mln teńge múliktik zalal keltirilgen. Osyndaı qylmystyq árekettiń nátıjesinde alynǵan 31 mıllıon teńge aıyrbastaý túrindegi operatsııalar arqyly zańdy aınalymǵa jiberilgen. Sot úkimimen K. kináli dep tanylyp, 217-baptyń 3-bóligi 2-tarmaǵy, 218-baptyń 2-bóligi 3-tarmaǵymen 5 jylǵa bas bostandyǵynan aıyrý jazasy kesildi. Ol – tek oblys aýmaǵynda 5 jylǵa sottalǵan altynshy áıel», - dedi N.Ahmetov.
Ahmetovtiń keltirgen málimetine qaraǵanda, jyl basynan beri departament óndirisinde 37 qylmystyq is tirkelse, sonyń 25-i aıaqtalǵan. Bitken isterdiń basym bóligi sotqa jiberilgen.
Aıaqtalǵan ister boıynsha belgilengen zalal 837 mln teńge bolsa, tyıym salynǵan qarajatty qosa alǵanda, sonyń 365 mln teńgesi óteldi.
Sondaı-aq kóleńkeli ekonomıka salasynda 468 mln teńgeden astam somaǵa jalǵan shot-faktýralardy berý deregi anyqtaldy, saldarynan memleketke tólenbegen salyq túrinde keltirilgen zalal kólemi 100 mln teńgeden asty.
Eske sala keteıik, budan buryn jalǵan shetel valıýtasyn ótkizý faktileri jıilep ketkenin jazǵan bolatynbyz.