Oralda 11 kún buryn joǵalyp ketken turǵyndy izdeýge tikushaq shyǵaryldy

ORAL. QazAqparat – Oral qalasynyń turǵyny 5 qarasha kúni sańyraýqulaq terýge shyǵyp, qaıtyp kelmegen. Іzdeý jumystaryna tikushaq tartyldy, dep habarlaıdy QazAqparat TJM baspasóz qyzmetine silteme jasap.

Oral qalasynyń 1949 jylǵy turǵyny 5 qarasha kúni tańerteń sańyraýqulaq terý úshin ormanǵa ketip, sodan qaıtyp oralmaǵan. 6 qarashada týystary Batys Qazaqstan oblysynyń Tótenshe jaǵdaılar departamentine júgindi.

Joǵalǵan adamdy izdeýge «Qazavıaqutqarý» AQ tikushaǵy jumyldyryldy. Jalpy, izdeý júrgizilgen aýdan – 56 sharshy km jáne sýly aýmaqta – 25 km.

Іzdestirý-qutqarý jumystaryna 6 qarashadan bastap qutqarýshylar, polıtsııa, eriktiler, jergilikti turǵyndar, ormanshylar, áskerı qyzmetkerler qatysyp jatyr. Olardyń jalpy sany – 325 adam jáne 41 tehnıka shyǵaryldy.

Osy ýaqytqa deıin izdestirý jumystary nátıje bermedi. Týystarynyń aıtýynsha, joǵalǵan adam alkogoldi asyra paıdalanbaǵan, este saqtaý qabiletinen aıyrylmaǵan. Sonymen qatar, onymen birge uıaly telefonynyń bolmaǵany belgili boldy.

Aıta ketý kerek, jyl basynan beri oblys boıynsha 10 izdestirý-qutqarý jumystary júrgizildi. Osyǵan baılanysty, jazataıym oqıǵalardy boldyrmaý úshin Batys Qazaqstan oblysynyń Tótenshe jaǵdaılar departamentiniń ókilderi turǵyndar men qonaqtardy qarapaıym qaýipsizdik erejelerin saqtaýǵa shaqyrady:

- qarttar men balalardy ormanǵa jalǵyz jibermeńiz;

- ormanǵa barǵan kezde týystaryńyz ben dostaryńyzǵa marshrýt pen úıge qaıtý ýaqytyn aıtyńyz;

- uıaly telefondy tolyq qýattańyz jáne balansyńyzdy toltyryńyz, uıaly telefonnan basqa, mehanıkalyq saǵattyń bolǵany jaqsy;

- jarqyn tústi kıim kıip, sondaı tústi kıimderdi qosymsha alyp alyńyz;

- barlyq qajetti zattar rıýkzagyńyzda bolýy kerek: ysqyryq, sirińke, kompas, azyq-túlik, sý, alǵashqy medıtsınalyq kómek qobdıshasy, balta, qazansha, jándikterge qarsy repellent, ot jaǵýǵa arnalǵan qurǵaq spırt tabletkalary.