Oral jylý elektr ortalyǵyn jańartýǵa qosymsha qarjy bólinbeıdi
«QR Energetıka mınıstrliginiń 041 «jylý-energetıkalyq júıesin damytý» bıýdjettik baǵdarlamasy aıasynda 2020 jyldan bastap BQO ákimdiginiń «Jaıyqjylýqýat» AQ Oral JEO-ny týrboagregatty aýystyrý bóligi boıynsha qaıta jańartý» jobasyn iske asyrý bastaldy. Jobany júzege asyrý úshin 2020 jyly 252 mln teńge bólinip, ıgerildi. 2021 jyly jobany aıaqtaý úshin 2,4 mlrd teńge bólindi, onyń ishinde 706 mln teńge túzetý kezinde bıýdjetke keri qaıtaryldy. Sondaı-aq 1 mlrd teńge ıgerilmedi, sonyń nátıjesinde tikeleı nátıjelerge qol jetkizilmedi», - dep jazdy Álıhan Smaıylov depýtattyq saýalǵa bergen jaýabynda.
Qosymsha qarjy bólýge qatysty Úkimet basshysynyń aıtýynsha, bıýdjet kodeksiniń 46-babyna sáıkes qosymsha qarjy aldyńǵy qarjy jylynda bólingen nysanaly damý transfertteri boıynsha bıýdjettik baǵdarlamalarda aıqyndalǵan, jergilikti bıýdjettik ınvestıtsııalardyń tikeleı nátıjelerine qol jetkizgen jaǵdaıda bólinedi.
«Ótken qarjy jylynda tikeleı nátıjelerge qol jetkizilmegen jáne jergilikti bıýdjetten qosa qarjylandyrý qamtamasyz etilmegen jaǵdaıda nysanaly damý transferti jergilikti bıýdjettik ınvestıtsııalardy iske asyrýǵa qaıta berilmeıdi. Osylaısha, joba boıynsha tikeleı nátıjelerge qol jetkizilmedi jáne qosa qarjylandyrý tolyq kólemde qamtamasyz etilmegen. Osyǵan baılanysty respýblıkalyq bıýdjettik baǵdarlamalardyń ákimshisi tikeleı nátıjelerge qol jetkizý jáne ony jergilikti bıýdjetten qosa qarjylandyrýdy qamtamasyz etý jónindegi árbir ınvestıtsııalyq jobany naqty qaraýy qajet», - dep atap ótti Premer-Mınıstr.
«Joǵaryda aıtylǵan jaıttardy eskere kele, respýblıkalyq bıýdjet esebinen 1,7 mlrd teńge somasynda jobany odan ári qarjylandyrý týraly máseleni qaraý múmkin emes. Jobany jergilikti bıýdjet qarajaty esebinen iske asyrýdy jalǵastyrý qajet», - dep túıindedi Mınıstrler kabınetiniń basshysy.