Oral túrmesinde otyrǵan 11 adam densaýlyǵyna shaǵym aıtyp, aýrýhanaǵa jetkizildi
BQO densaýlyq saqtaý basqarmasynyń baspasóz qyzmetinen málim etkenindeı, 3 tamyz kúni Aqtóbe kóshesi, 291 mekenjaıynda ornalasqan RÝ-28 mekemesinen shaqyrtý túsken.
«Saǵat 20.33-te oblystyq jedel medıtsınalyq járdem stantsııasynyń 103 operatoryna RÝ-28 mekemesiniń kezekshi qyzmetkerinen jazasyn óteýshilerdiń densaýlyǵyna qatysty shaǵymdanǵany jóninde habarlandy. Oqıǵa ornyna 4 brıgada baryp, 47 jazasyn óteýshini qarady. Sonyń ishinde 26-dan 47 jasqa deıingi 11 adam qalalyq kópbeıindi aýrýhanaǵa jetkizildi. Bas súıekteri, keýde tusy, qabyrǵasy rentgenge túsirildi. Travmatolog pen neırohırýrg qarap, keńes berdi. Jaǵdaılary qanaǵattanarlyq, ambýlatorlyq em alýǵa usynyldy. Jazasyn óteýshiler aıdaýylǵa berildi», - dep habarlady vedomstvodan.
BQO boıynsha qylmystyq-atqarý júıesi departamentiniń naqtylaýynsha, qaýipsizdigi joǵary №28 mekemesinde 3 tamyz kúni saǵat 9.00-den 13.00-ge deıin jalpy tintý josparly is-sharalary júrgizilgen. Oǵan departamenttiń jeke quramymen birge Ulttyq ulannyń áskerı qyzmetshileri jáne BQO prokýratýrasynyń ókilderi qatysqan.
«Tintý jumystary aıaqtalǵannan keıin jazasyn óteýshiler tyıym salynǵan zattardy tárkileýge qarsylyq bildirip, qaıtyp berýdi talap ete bastady. Mekeme ákimshiliginiń zańdy talaptaryna qulaq aspaǵan olar qyzmetkerler men áskerı qyzmetshilerge aıqaılap, til tıgizýin jalǵastyra berdi. Quqyqqa qaıshy áreketterdi toqtatý úshin jazasyn óteýshilerdiń bir bóligi tártip ızolıatoryna ornalastyryldy. Oqıǵa ornynda departament basshylyǵy men prokýratýra ókilderi boldy. Atalǵan derek boıynsha QR QK 428-babyna (qylmystyq-atqarý mekemesi ákimshiliginiń zańdy talaptaryna baǵynbaý) sáıkes sotqa deıingi tergeý amaldary bastalyp, tekserý júrgiziláp jatyr. QR Qylmystyq is júrgizý kodeksiniń 201-babyna sáıkes basqa aqparat jarııalaýǵa jatpaıdy. Oǵan qosa, BQO boıynsha qylmystyq-atqarý júıesi departamenti qyzmettik tekserýdi bastady», - delingen resmı habarlamada.
Eske sala keteıik, budan buryn BQO-da «Dármek» is-sharasy barysynda 13 medıtsına qyzmetkeri jaýapqa tartylǵanyn jazǵan bolatynbyz.