Oral turǵyny tonaýshydan qutqarǵan Ulttyq ulan jaýyngerine alǵys bildirdi

ORAL. QazAqparat - Oral qalasynyń turǵyny Aleksandr Fedın QR Ulttyq ulanyna qarasty 5517-áskerı bólimine kelip, tonaýshydan qutqarǵan kelisimshartpen qyzmet etetin qatardaǵy jaýynger Qýanysh Saılaýovqa alǵys aıtty, dep habarlaıdy «QazAqparat» tilshisi.

«Batys» óńirlik qolbasshylyǵynyń baspasóz qyzmetinen túsken málimetke qaraǵanda, Q.Saılaýovtyń bul batyl is-áreketi A.Fedınniń polk komandıri, podpolkovnık Asylbek Shaıqamalovtyń atyna jazǵan hatynan keıin ǵana belgili boldy. Qala turǵyny Ulttyq ulan jaýyngeriniń kásibı sheberligi men belsendi azamattyq ustanymyn atap ótip, shynaıy kóńilden rızashylyǵyn bildirdi. Qýanyshtyń ózi bul jóninde eshkimge aıtpaǵan.

Aıta keteıik, oqıǵa 10 mamyr kúni saǵat 13.00 shamasynda «Keńdala» shaǵyn aýdanyndaǵy «Amanǵalı» dúkeniniń mańynda oryn alǵan. Betperde kıip, pyshaqpen jáne elektrshokermen qarýlanyp, mototsıklge mingen belgisiz eki er adam A.Fedınge qaraqshylyq shabýyl jasap, onyń iri kólemdegi qarjysy bar qara sómkesin tartyp almaq bolǵan. Sol kezde dúkende bolǵan Qýanysh Saılaýov aıqaı-shýdy estigen boıda kóshege júgirip shyqqan. Qýanysh ádis qoldanyp, Aleksandrmen birge qaraqshylarǵa toıtarys bergen. Shabýyldaýshylar túk tyndyra almaı, qashyp ketken.

Q.Saılaýov Ulttyq ulan qatarynda 2014 jyldan beri qyzmet etedi. Ól alǵashqy kúnnen-aq ózin jaqsy qyrynan kórsetip, saýatty da tabandy jaýynger ekenin tanytyp keledi. Minsiz qyzmeti úshin áldeneshe ret áskerı bólim basshylyǵy tarapynan yntalandyrylǵan.