Oral Sháripbaev: Táýelsizdiktiń arqasynda memlekettik tildiń mártebesi ósti
«Táýelsizdiktiń arqasynda ana tilimizge qaıta oraldyq. Áýel basta «qazaq qazaqpen qazaqsha sóılesý kerek» degen ustanym qalyptasty. Al qazir tipti eldegi basqa ult ókilderi qazaq tilin memlekettik til retinde moıyndap, úırene bastady. Olar mundaı sheshimdi buıryqpen emes, júrekpen qabyldady. Bolashaq – jastardyń qolynda. Sondyqtan biz óskeleń urpaqty patrıottyqqa tárbıelep, óz tilin qadirleýge úıretýimiz qajet», - deıdi Oral Sháripbaev.
Onyń aıtýynsha, 30 jyldyń ishinde memleketimiz dostyqtyń mekenine aınaldy. Qazaqstanda turatyn túrli etnos ókilderi bir úıdiń balasyndaı bereke-birlikte ǵumyr keshýde.
«Qazir kóptegen eldi mekender men kóshelerdiń ataýlary qazaqshalanyp jatyr. Bul da aıtarlyqtaı jetistik. Ásirese Shyǵys Qazaqstanda sońǵy jyldary anomastıka salasynda aýqymdy jumystar atqarylýda. Máselen, burynǵy Zyrıan aýdanyna Altaı ataýy berildi. Sondaı-aq ıdeologııalyq turǵydan eskirgen kóshe ataýlaryna elge eńbegi sińgen, tuǵyry bıik tulǵalarymyzdyń esimderi berilýde. Aldaǵy ýaqytta da osy baǵyttaǵy tıisti jumystar toqtap qalmaıdy degen senimdemin», - deıdi halyqaralyq «Qazaq tili» qoǵamynyń vıtse-prezıdenti.
Sondaı-aq ol óz sózinde memlekettik tildiń mártebesin arttyrýǵa Elbasy Nursultan Nazarbaevtyń eren eńbek sińirgenin aıtty.
«Osydan birshama jyl buryn Tuńǵysh Prezıdenttiń qabyldaýynda bolǵan edim. Sol kezde ol eldiń bolashaǵy ana tilimizdiń saqtalýyna baılanysty ekendigin aıtqan-tuǵyn. Rasymende tilinen aıyrylǵan halyqtyń bolashaǵy bulyńǵyr, keleshegi kómeski. Mine, sondyqtan ata-bababan mıras bolyp kele jatqan baı tilimizdi kózimizdiń qarashyǵyndaı qasterleıik», - deıdi Oral Sháripbaev.