Oral meshitterinde qurbandyq etin muqtajdarǵa úlestiretin arnaıy mamandar bolady

ORAL. QazAqparat – Oral qalasynda Qurban aıt kezinde mal soıatyn arnaıy oryndar belgilendi, dep habarlaıdy QazAqparat tilshisi.

BQO bas ımamy Baqytjan Sabyralıevtiń málim etkenindeı, maldy «El yrysy» bazarynda, «Batys adal et» jáne «Kýbleı» JShS-da shalýǵa bolady.

Baqytjan Quralbaıulynyń aıtýynsha, osy oryndarda arnaıy kıim kıgen qasapshylar bekitildi.

Olar oqytýdan ótkizilip, baǵany barynsha kótermeý týraly túsindirme jumystary júrgizildi. Sonymen qatar maldy jeke úılerdiń aýlasynda da soıýǵa bolady.

Mal soıý oryndarynda arnaıy kıimi joq qasapshylardyń qateligine ımamdar jaýap bermeıdi.

«Qurban aıt namazy 9 shilde kúni jergilikti ýaqyt 06.30-da oqylady. Saǵat 07.00-den bastap qurban shala berýge bolady. Qurbandyqqa shalǵan maldyń bir bóligin otbasyna qaldyryp, endi bir bóligin kórshi-kólem, jaqyn-jýyqtarǵa, taǵy bir bóligin muqtajdarǵa berýge bolady. Muqtajdar meshitterge kelip, sondaı-aq arnaıy saıt arqyly tirkelip jatyr. Meshitterde arnaıy bekitilgen mamandar bolady. Etti solarǵa jetkizse, muqtajdarǵa úlestirip beredi», dedi bas ımam.

Qurban aıt kúnderi mal satýmen aınalysatyn turǵyndardyń sózine qaraǵanda, qoı 40-85 myń teńge aralyǵynda satylady.

Foto: i2.wp.com