Oral mehanıkalyq zaýytynda órt shyqty

ORAL. QazAqparat – Oral mehanıkalyq zaýytynda órt shyqty, dep habarlaıdy QazAqparat tilshisi.

BQO TJD baspasóz qyzmetinen túsken málimet boıynsha, oqıǵa 5 tamyz kúni saǵat 11:55-te boldy.

«Oral mehanıkalyq zaýyty» JShS aýmaǵynda 2-tseh shatyry men jaryq shamy jandy. Órt aýmaǵy – 240 sharshy metr. Jedel shtab qurylyp, «tilsiz jaýdy» aýyzdyqtaýǵa 15 tehnıka, 56 adam jumyldyryldy. Órt 12:29-da oqshaýlanyp, 12:40-ta sóndirildi. Qaza bolǵandar men jaraqat alǵandar joq. Qazirgi kezde órttiń shyǵý sebebi, keltirilgen shyǵyn anyqtalyp jatyr», - dep habarlady vedomstvodan.

Departament málimeti boıynsha jyl basynan beri óńirde 263 órt tirkelip, saldarynan 5 adam qaza tapty, 4 adam túrli jaraqat aldy. Órtten kelgen shyǵyn 177,7 mln teńgege jýyqtady.