Oral qalasynyń bilim mekemelerinde sanıtarlyq talaptar qalaı saqtalyp otyr

ORAL. QazAqparat – Oral qalasynyń balabaqsha, mektepterinde sanıtarlyq talaptardyń qalaı saqtalyp otyrǵany jóninde qoǵamdyq baqylaýdyń BQO boıynsha úılestirýshisi Aıgúl Túrkına áńgimelep berdi, dep habarlaıdy QazAqparat tilshisi.

Onyń aıtýynsha, qoǵamdyq baqylaýshylar bir apta boıy balabaqshalar men mektepterge monıtorıng júrgizip, atqarylyp jatqan jumystarmen tanysýda.

«Biz qalalyq bilim berý bólimi ókilderimen birge aldymen «Baldyrǵan» jáne «Juldyz-aı» balabaqshalarynda boldyq. Munda baldyrǵandardyń jalpy sanynyń 50 paıyzdaıy kelýde. Balabaqsha qyzmetkerleri karantın talaptary aıasynda jumys isteýde. Qazirgi tańda balalardyń bári de saý, medıtsınalyq pýnktter dári-dármekpen, medıtsınalyq qural-jabdyqtarmen qamtamasyz etilgen. Ata-analar da barynsha betperde kııý rejımin saqtaýda», - dedi A.Túrkına.

Qoǵamdyq baqylaý toby №44 orta mektepte bolǵan kezde birqatar usynym jasaldy. Atap aıtqanda, múmkindigine qaraı kireberiste kelgenderdiń nazaryna túsý úshin betperde kııý týraly habarlandyrý turǵany jón. Bir atap óterlik jaıt, qajetti taýarlar alýǵa memlekettik satyp alýdy mektep ákimshiliginiń ózi júrgizýdi bıýdjetti tıimdi paıdalanýǵa múmkindik beredi. Buǵan sanıtaızerler ornatylyp, kvarts shamdary men dezınfektsııalyq quraldardyń qoıylǵany dálel. Aýysymdar boıynsha sabaq kestesi oqýshylar bir-birimen jolyqpaıtyndaı oılastyrylǵan. Kiretin jáne shyǵatyn esikteri de bólek. «Bir kabınet – bir aýmaq» qaǵıdaty boıynsha jolaqtarmen shekteý de túrli synyptardyń bir-birimen aralaspaýyna múmkindik beredi. Mektep ákimshiligine ata-analarmen túsinik jumystaryn jalǵastyrý usynyldy.

«Búgin tórt mektepti aralap, sonyń aldynda ózderi bergen derekterdi tekserip shyqtyq. Sonyń ishinde, ásirese, №16 mektepti erekshe atap ótýge bolady. Munda sanıtarlyq talap qatań saqtalýda. Ata-analarmen de jumystar júrgizilýde. Al №9 orta mektepte úsh oqýshydan koronavırýs anyqtalýyna baılanysty karantındik sharalar atqarylýda. Mektep dırektorynyń sózine qaraǵanda, olar aldaǵy dúısenbide test tapsyrady. Test qorytyndysy indettiń joqtyǵyn kórsetse, kezekshi synypta oqıtyn eki shákirt mektepke oralady», - dedi QazAqparat tilshisine A.Túrkına.

Eske sala keteıik, budan buryn BQO-da 4 oqýshynyń koronavırýs juqtyrǵanyn jazǵan bolatynbyz.