Oral qalasynda jeke ınvestorlar esebinen 2 mektep boı kóteredi

ORAL. QazAqparat – Oral qalasynda jeke ınvestorlar esebinen 2 mektep boı kótermek. Bul týraly oblys ákimi Ǵalı Esqalıevtiń tóraǵalyǵymen bilim salasyndaǵy qurylys jumysyna ınvestıtsııa tartý máselesi jóninde ótken keńeste aıtyldy, dep habarlaıdy QazAqparat tilshisi.

BQO bilim basqarmasy basshysynyń orynbasary Aıajan Júnisovanyń sózine qaraǵanda, jyl basynda oblysta 7 úsh aýysymdy mektep bolsa, qazir bulardyń sany úsheý bolyp otyr.

Al apatty jaǵdaıdaǵy 7 mektep bolsa, bul bireýge ǵana kemidi. Qazirgi tańda bul máseleni sheshý baǵytynda oblysta úsh mekteptiń qurylysy júrgizilýde. Atap aıtqanda, Oralda №33, Qaztalov aýdanynda 600 oryndyq A.Orazbaeva atyndaǵy, 60 oryndyq Saryqudyq mektebiniń ǵımarattary salynýda.

«Sonymen qatar óńirde mektep qurylysy úshin jeke ınvestorlar tartý jumysy júrgizilýde. Kúni búgin úsh aýysymdyq mektepter jumysyn jeńildetý maqsatynda «Nýrkapstroıgaz» JShS Oralǵa qarasty Zachagan kentinde 900 oryndyq mektep qurylysyn bastady. Al «Kaz-Holl» JShS apatty jaǵdaıdaǵy №31 mekteptiń ornyna jańasyn turǵyzbaqshy», dedi A.Júnisova.

Іndetke baılanysty bilim berý júıesi qashyqtan oqytýǵa kóshirilgeni belgili. Qazirgi tańda barlyq 379 mektep ınternet jelisine qosylǵan. Internet sapasyn arttyrý úshin bıýdjetten 56 mln teńge bólindi.

Oblys mektepterinde 15382 kompıýterlik tehnıka bolsa, sonyń 7324 nemese 47,6 paıyzy ǵana QR Bilim jáne ǵylym mınıstrligi talaptaryna sáıkes kelgen edi. Sondyqtan qashyqtan oqytýdy uıymdastyrý úshin Úkimet qory esebinen bıyl 14970, jergilikti bıýdjet qarjysyna 4449 dana kompıýter alyndy. Bul kompıýterler qaıtarymdyq negizde muqtaj oqýshylarǵa berildi. Eger jyl basynda ár 7 oqýshyǵa bir kompıýterden kelse, qazir tórteýine bireýden tıip tur.

Taǵy bir mańyzdy másele – oqýshylar men bilim berý mekemeleri qyzmetkerleriniń qaýipsizdigin qamtamasyz etý maqsatynda óńir basshysynyń tapsyrmasyna sáıkes oblys qazynasynan 482,4 mln teńge qaralyp, barlyq mektep-balabaqshalar beınebaqylaý kameralary jáne ǵımarat ishindegi ájethanalarmen qamtyldy.

Basqarma basshysy orynbasarynyń aıtýynsha, bıyl Oralda Servıs jáne jańa tehnologııalar kolledji «Aspazshy» JShS-yna satyp alý quqyǵynsyz 10 jyl merzimge senimgerlik basqarýǵa berildi. Qazirgi tańda Batys Qazaqstan ındýstrıaldyq kolledjin «Oral transformator zaýyty» JShS-yna osyndaı basqarýǵa berý úshin ázirlik jumystary júrgizilýde.

Oblysta 34 kolledjde 17 myńdaı shákirt bilim alýda. QR tuńǵysh Prezıdentiniń «bes áleýmettik bastamasy» aıasynda jeke ınvestorlar 1 myń orynǵa eseptelgen 4 jataqhana salýda. Osy jataqhanalar iske qosylǵan kezde oryn tapshylyǵy joıylady.

Oblys ákimi Ǵalı Esqalıev kópqabatty úılerdiń birinshi qabatynda balabaqsha ashý úshin jeke ınvestorlar tartý qarastyrylyp jatqanyn, bilim berý sapasyna erekshe mán berý qajettigin jetkizip, osy baǵyttaǵy jumystardy jalǵastyrýdy tapsyrdy.

Eske sala keteıik, budan buryn Oralda jańa jyl qarsańynda 216 otbasy baspanaly bolǵanyn jazǵan edik.