Oral qalasynda mektepterge jańa avtobýstar berildi

ORAL. QazAqparat – Oral qalasynyń ákimi Mırjan Satqanov shahardaǵy bes mektepke jańa avtobýs kiltterin tabys etti, dep habarlaıdy QazAqparat tilshisi.

Avtobýstar Memleket basshysy Qasym-Jomart Toqaevtyń tapsyrmasy negizinde Qazaqstan Respýblıkasy Oqý-aǵartý mınıstrligi balalardyń quqyǵyn qorǵaý komıtetiniń bastamasymen alyndy.

Qala basshysy Mırjan Munaıdaruly balalardyń qaýipsizdigin qamtamasyz etý maqsatynda bilim berý uıymdarynda júrgizilip jatqan jumystarǵa toqtalyp, oqýshylardyń mektepke tasymalyn sapaly uıymdastyrýda mektep avtobýsy parkin jańartý mańyzdy ekendigin atap ótti.

«Qaladaǵy barlyq mektepterdiń qaýipsizdigin qamtamasyz etý jumystary qatań baqylaýǵa alynyp, jumystar júrgizilip keledi. Beınebaqylaý júıelerin ornatý, dabyl túımelerin jedel basqarý ortalyǵyna baılanystyrý, týrnıkettermen jabdyqtaý jumystary tolyqtaı atqaryldy. Qala mektepterinde qazirgi ýaqytta 60 myńdaı oqýshy bilim alady. Olardyń 2700-i mektepke tasymal arqyly qatynaıdy. Osy oqýshylardyń kúndelikti tasymaldaýyn sapaly uıymdastyrý jáne mektepterdiń ıelegindegi avtokólikterdi jańartý máselesi biraz jyldan beri usynylyp kelgen bolatyn. Ótken jyldan bastap respýblıkalyq bıýdjetten qarjy bólinip, mektepterdiń avtobýs parkin jańartýǵa múmknidik jasaldy. Mine, búgin qalamyzdaǵy bes mektepke avtobýs alynyp otyr. Kólikterińiz qutty bolsyn, ıgi isterimiz jalǵasyn taba bersin», – dedi qala ákimi.

Álııa Moldaǵulova atyndaǵy №38 mektep-lıtseıi ata-analar komıtetiniń tóraǵasy Qanat Imanǵalıev ata-analar men mektep ujymdary atynan rahmetin aıtyp, bul memleket qoldaýynyń kórinisi ekenin jetkizdi.

Jańa avtobýstar №12, 14, 20, 32 jáne 38 mektepterge berildi.

Zamanaýı kólikterde balalardyń qaýipsizdigine basa kóńil bólingen. Qaýipsizdik belbeýleri, sómkelerge arnalǵan sóreler, beınebaqylaý kamerasy bar.

Taǵy bir basym tusy – esikteri ashyq kezde qozǵalysty tejeıtin mehanızmmen jabdyqtalǵan.

Qalalyq bilim berý bóliminen túsken málimetke qaraǵanda, buǵan deıin mundaı jańa avtobýstar oblys aýdandaryndaǵy bilim oshaqtaryna berilgen edi.

Qaladaǵy mektepterge áli bes avtobýs kerek.

Osyǵan deıin 8 mektepke oqýshylar tasymaldanyp keldi. Endi buǵan Jelaev kentindegi №14 mektep qosylyp otyr. Munda balalardyń temir joldan ótýi qaýipti bolǵandyqtan, ata-analar ótinishi eskerildi. Sondaı-aq merdigerler arqyly №18, 22, 30, 38, 48 mektepterge balalar tasymaldanady. Qala boıynsha barlyǵy 2700 oqýshy tasymaldanatyn bolady.

Eske sala keteıik, budan buryn Batys Qazaqstanda 680 balalar lageriniń jumys istep turǵanyn jazǵan bolatynbyz.