Oral qalasynda 60 mektepte dabyl qondyrǵysy ornatyldy
BQO polıtsııa departamentiniń bastyǵy Arman Orazalıevtiń aıtýynsha, oblys ortalyǵynda barlyǵy 65 mektep bolsa, sonyń 60-y – memlekettik.
Onyń sózine qaraǵanda, qazirgi tańda 60 mekteptegi SOS arnaıy qondyrǵysy BQO polıtsııa departamentiniń jedel basqarý ortalyǵy júıesine qosyldy.
- Eger mektepterde tosyn oqıǵalar oryn alsa, batyrmany bassa boldy, polıtsııa qyzmetkerleri sol boıda jetip, máseleniń mánisine kóz jetkizedi. Bir aıta ketetin jaıt, osyǵan deıin jedel basqarý ortalyǵy qyzmetkerleri jetispeıtin. Oblys ákiminiń qoldaýymen jyl sońyna deıin jergilikti bıýdjet esebinen 25 qyzmetker alynbaqshy. Sonyń 15-i jedel basqarý ortalyǵynda, 10-y tabıǵat qorǵaý polıtsııasynda qyzmet atqaratyn bolady. Óıtkeni qalada tazalyq únemi saqtala bermeıdi. Qoqys kez kelgen jerge tastalady. Sondyqtan munyń bárin retteý úshin kóp jumys atqarylýy kerek, - deıdi departament bastyǵy.
- Arman Moldııaruly, Prezıdentimiz jańa Joldaýynda «Men Memleket basshysy retinde kámeletke tolmaǵandarǵa jasalǵan zorlyq-zombylyqtyń kez kelgen túrine qatysty jazany kúsheıtýdi talap etemin», degen bolatyn. Osyǵan baılanysty ne aıtar edińiz?
- Iá, bul másele bizdiń udaıy nazarymyzda. Ókinishke qaraı, jasóspirimder qolymen jáne solarǵa qatysty jasalatyn qylmystar sany ótken jylǵy osy kezeńmen salystyrǵanda, 70 paıyzǵa ósip ketip otyr. 1 qyrkúıekten mektepterde jańa oqý jyly bastaldy. Sondyqtan barlyq bilim ordalary bizdiń baqylaýymyzda bolady.
- Sonda qandaı qylmystar, naqtyly aıta alasyz ba?
- Aldymen urlyq, tonaý derekterin aıtar edim. Sondaı-aq vandalızm de joq emes. Oǵan kóp alysqa barmaı-aq, Jeńis alańyna barǵan adamdar kóz jetkize alady.
- Kıberbýllıng te bar ma?
- Ol da bar. Mine, osynyń báriniń aldyn alý úshin qoldan kelgenniń bárin jasaý kerek. Qala mektepteri kámeletke tolmaǵandar isimen aınalysatyn ınspektorlarmen qamtamasyz etildi. Al aýdandarda tártip saqshylary jetispeıtindikten, bul mindet ýchaskelik polıtsııa ınspektorlaryna júkteldi.
- Oqý jyly bastalǵannan keıin balalardyń ózderi bilim alatyn mektepterge barýy jıileıdi. Jol-kólik oqıǵalarynyń aldyn alý úshin mektepter tusynda baǵdarsham ornatylý jaıy qalaı ?
- Kúni búgin qalada 26 mektep mańynda baǵdarsham ornatyldy. Taǵy altaýynda jasalatyn bolady. Bul jerde kóbinese batyrmaly baǵdarsham bolýy mańyzdy. Árıne, bári bıýdjet qarjysyna baılanysty. Osy oraıda qala ákimimen apta saıyn kezdesip, osy máseleni de sheshý jaıyn oılastyrýdamyz.
Eske sala keteıik, budan buryn «tramadol koroliniń» ne úshin tutqyndalǵany belgili bolǵanyn jazǵan edik.