Oral qalasynda 29 aýla abattandyryldy
Solardyń biri Ábýbákir Kerderi kóshesi, 172-mekenjaıynda Respýblıka kúnine oraı paıdalanýǵa berildi.
Qala ákimi Mırjan Satqanovtyń aıtýynsha, shaharda abattandyrylmaǵan aýla aýmaqtarynyń sany azaıyp keledi. Jóndeý jumystary júrgizilgen aýlalarda aǵashtar da tolyqtaı saqtaldy.
Qala boıynsha áli de 180-ge jýyq aýla aýmaǵy abattandyrýdy qajet etedi. Sondyqtan bul jumys aldaǵy ýaqytta jalǵastyrylady.
Atalǵan mekenjaıda qurylys jumystaryn «Kapıtal Stroı Proekt grýpp» JShS júrgizdi. 4 myń sharshy metr aýla aýmaǵy 4 úıdegi 500-deı páterdi qamtıdy.
Jańa aýlada sporttyq oıyn jáne balalar alańy, trenajer qurylǵylary ornatylyp, dene shynyqtyrýmen aınalysýǵa tolyq jaǵdaı jasalǵan. Sondaı-aq jobaǵa saı jaryqtandyrý, kógaldandyrý, oryndyqtar men qoqys jáshikteri qoıylǵan.
Qalany abattandyrý turǵyndarmen tyǵyz baılanys ornatýdy kózdeıdi. Atap aıtqanda, «Aýlalardy keshendi abattandyrý» baǵdarlamasy boıynsha turǵyndar ózderi ótinim qaldyryp, aýla aýmaǵynda júrgizý qajet jumystardy kórsete alady. Munda turǵyndar jobany pysyqtaýǵa, jumystardy baqylaýǵa qatysyp qana qoımaı, daıyn nysannyń saqtalýyna jaýap beredi. Sondaı-aq joba aıaqtalǵan soń, abattandyrylǵan aýlalar boıynsha MIB (menshik ıeleriniń birlestigi), JS (jaı seriktestik) nemese PIK ókilderimen bes jylǵa shart jasalyp, olar osy ýaqyt ishinde alańdardy kútip ustaýy tıis.
Qala ákimdiginen alynǵan málimetke qaraǵanda, 29 aýlany abattandyrý jumystary ótken jyly bastalǵan edi. Buǵan 1,2 mlrd teńge qarajat bólindi.
Eske sala keteıik, budan buryn Oralda tórt qabatty jańa turǵyn úı boı kótergenin jazǵan bolatynbyz.