Oral qalasynda 180 otbasy baspanaly boldy

ORAL. QazAqparat – Oral qalasynda «Nurly jer» memlekettik baǵdarlamasy aıasynda 180 páterlik eki turǵyn úı paıdalanýǵa berildi, dep habarlaıdy QazAqparat tilshisi.

Zachagan kentinde boı kótergen eki toǵyz qabatty úıdiń páterleri konkýrstyq negizde 50/50 qaǵıdaty boıynsha bólindi.

Bylaısha aıtqanda, baspanalardyń teń jartysy turǵyn úı kezeginde turǵan azamattarǵa berilse, qalǵany «Qazaqstannyń turǵyn úı qurylys jınaq banki» AQ salymshylarynyń úlesine tıdi.

Jańa páter ıelerin oblys ákimi Ǵalı Esqalıev quttyqtap, karantındik shekteý sharalaryna baılanysty az adamnyń jınalǵandyǵyn aıtyp, aldaǵy ýaqytta turǵyndar qýanyshynyń eselene túsýine tilektestigin bildirdi.

«Nurly jer» memlekettik turǵyn úı qurylysy baǵdarlamasy Elbasy Nursultan Nazarbaevtyń bastamasymen qolǵa alynǵany belgili. Memleket basshysy Qasym-Jomart Toqaevtyń tapsyrmasyna sáıkes azamattardy qoljetimdi baspanamen qamtamasyz etý baǵytynda Batys Qazaqstan oblysynda da turǵyn úı qurylysy qyzý júrgizilýde.

«Bolashaq-T» JShS men «Otdelstroı» qurylys-kommertsııalyq fırmasy» JShS turǵyzǵan eki úıdi elektrlendirý jumystary aıaqtalyp, ınjenerlik jeliler tartylǵan.

Qala ákimi Abat Shynybekovtiń aıtýynsha, qazirgi tańda Oral-Saratov joly boıynda ornalasqan úılerdiń aldyn abattandyrý jáne kógaldandyrý jumystary júrgizilýde. Sondaı-aq balalar oınaıtyn alańqaılar, sport mektebi, gastronom, trotýar, janar-jaǵar maı quıý stansasy salynady. Bul jumystardyń barlyǵy bıyl márege jetpekshi.

Eske sala keteıik, budan buryn Oralda 284 otbasy jańa baspanaǵa qol jetkizgenin jazǵan bolatynbyz.