Oral qalasynan Mysyrǵa jańa reıs ashylmaq

ORAL. QazAqparat – 21 sáýirden bastap Mánshúk Mámetova atyndaǵy Oral halyqaralyq áýejaıynan Mysyrǵa jańa reıs ashylady, dep habarlaıdy QazAqparat tilshisi.

Áýejaıdyń baspasóz qyzmetinen málim etkenindeı, Oraldan Sharm-el-Sheıh qalasyna ushýdy Scat Airlines áýe kompanııasy júzege asyrady.

Endi Oral qalasynan tanymal kýrortqa Boeing 737MAX áýe kemelerimen bes kúnde bir ret ushýǵa bolady. Reıster qazan aıyna deıin josparlanǵan.

Oral halyqaralyq áýejaıynyń bas dırektory Rýstam Bektemirov marshrýttyq jelini damytý jumystyń basty baǵyttarynyń biri ekendigin jetkizdi.

«Biz óńir turǵyndaryna el ishindegi suranysqa ıe baǵyttar boıynsha, sondaı-aq tanymal sheteldik kýrorttarǵa tikeleı reısterdiń qoljetimdi bolýyn kózdep otyrmyz. Mysyrǵa charterlik baǵdarlamanyń bastalýy bul máseleni sheshýdegi mańyzdy oqıǵa boldy», - dedi ol.

Aıta keteıik, Sharm-el-Sheıh Oral kestesindegi ekinshi halyqaralyq kýrorttyq baǵyt bolady. Jolaýshylarǵa Antalıaǵa da reıster qoljetimdi. Mamyr aıynyń sońynan bastap olardyń sany áli de ósedi: Scat Airlines Túrkııa kýrortyna aptasyna eki ret ushatyn charterlik baǵdarlamany bastaıdy.