Oral qalasynyń turǵyny saıajaı shatyrynda esirtki zerthanasyn uıymdastyrǵan

<p>ORAL. KAZINFORM &ndash; Batysqazaqstandyq polıtseıler saıajaı shatyrynda esirtki zerthanasyn uıymdastyrǵan Oral qalasynyń turǵynyn qolǵa túsirdi.</p>

BQO polıtsııa departamentiniń baspasóz qyzmetinen málim etkenindeı, uıymdasqan qylmysqa qarsy kúres basqarmasynyń qyzmetkerleri júrgizgen jedel izdestirý is-sharalary nátıjesinde esirtki zattary bar ósimdikterdi zańsyz ósirý deregi anyqtaldy. 

Tekserý barysynda 49 jastaǵy azamattyń saıajaı úıiniń shatyrynda esirtki zerthanasyn jabdyqtap, tyıym salynǵan ósimdikterdi ósirgeni belgili boldy. 

«Shatyrda ornalasqan esirtki zerthanasynan polıtsııa qyzmetkerleri 37 ydysta egilgen erekshe ıisi bar, jasyl tústi ósimdikterdi (syrtqy túri qarasoraǵa uqsas) tapty. Sonymen qatar jaryqtandyrýǵa arnalǵan 14 sham, jeldetý júıesi, eki termometr jáne tyńaıtqyshqa arnalǵan 15 bótelke suıyqtyq tabyldy. Saraılardy tintý barysynda da jasyl tústi, ósimdik tektes zattar salynǵan úsh paket jáne shegýge arnalǵan temir qurylǵy tárkilendi. Dárethana bólmesinde taǵy da esirtki ósimdigine uqsas keptirilgen 8 buta, ósimdik tektes zattar salynǵan 2 paket, 6 plastıkalyq staqan, úsh jumys istemeıtin jeldetkish kýler jáne jaryqtandyrý júıesiniń elementteri tabyldy. Tárkilengen zattardyń barlyǵy saraptamaǵa jiberildi, al atalǵan derek boıynsha QR QK 300-babyy 1-bóligine (quramynda esirtki zattar bar, ósirýge tyıym salynǵan ósimdikterdi zańsyz egip-ósirý) sáıkes sotqa deıingi tergeý amaldary bastaldy», dep habarlady vedomstvodan. 

Eske sala keteıik, budan buryn BQO-da 47 jylqyny ruqsatsyz aıdap bara jatqan avtokólik ustalǵanyn jazǵan bolatynbyz.