Oral qalasynda jylý jelileriniń teń jartysy tozǵan
BQO energetıka jáne turǵyn úı-kommýnaldyq sharýashylyq basqarmasynyń basshysy Mıras Múlkáıdiń Kazinform tilshisine málim etkenindeı, oblys ortalyǵynda jylý jelileri 50,4, Aqsaıda 10 paıyzǵa tozǵan.
Onyń sózine qaraǵanda, «Jaıyqjylýqýat» AQ óz qarajaty esebinen Oral qalasynda 1,4 mlrd teńgege 2 negizgi jabdyq (№ 3, № 5 energetıkalyq qazandyq) jáne 6,7 km jylý jelisine kúrdeli jáne aǵymdaǵy jóndeý jumystaryn josparlaǵan bolatyn.
«Qazirgi tańda atalmysh eki energetıkalyq qazandyqqa jáne 5,8 km jylý jelilerine jóndeý júrgizildi. «Jaıyqjylýqýat» AQ-nyń «QAZAQGAZ AIMAQ» AQ Batys Qazaqstan óńirlik fılıaly aldyndaǵy kredıtorlyq bereshegin óteý maqsatynda oblystyq rezervten 1,5 mlrd teńge bólindi. Kúni búgin «Jaıyqjylýqýat» AQ-nyń kredıtorlyq bereshegi joq», - dedi M.Múlkáı.
Basqarma basshysynyń aıtýynsha, Oral qalasynda 5-jylý magıstralyn (2-jylý magıstraly oıymynan 11-jylý kamerasyna bosatýǵa deıin) qaıta qurý jobasy qolǵa alynyp otyr.
«Jobanyń jalpy somasy – 1 mlrd 341,569 mln teńge. 2024 jyly jobany iske asyrýǵa respýblıkalyq bıýdjetten 500 mln teńge, jergilikti qazynadan 129,343 mln teńge bólinip, qarajat tolyqtaı ıgerildi. Budan basqa Qazaqstan Respýblıkasy Úkimetiniń rezervinen 2024 jylǵy 23 shildedegi № 590 qaýlysymen 573,775 mln teńge berildi. Qazirgi kezde qurylys-montaj jumystary 98 paıyzǵa atqarylǵan. Іske qosý-jóndeý jumystary jáne gıdravlıkalyq synaqtar júrgizilýde. Paıdalanýǵa berý merzimi – bıylǵy tórtinshi toqsan. Bul jobany júzege asyrýdaǵy maqsat – Oral qalasy jylýmen jabdyqtaý nysandaryndaǵy jelilerdiń tozýyn azaıtyp, apat deńgeıin tómendetý», - dedi M.Múlkáı.
Eske sala keteıik, budan buryn Oral qalasy jylytý maýsymyna qanshalyqty daıyn ekendigi týraly jazǵan edik.