Oral qalasynda úıleri sýǵa ketken 80 otbasy baspanaly boldy
Oral qalasynda saıajaıdaǵy jalǵyz baspanasy sýǵa ketip, jaramsyz bolǵan 80 otbasyǵa 1 tamyz kúni B.Jumaǵalıev kóshesi men «Samal» shaǵynaýdanyndaǵy kópqabatty eki úıden páterler berildi.
Jańa qonys ıelerine páter kiltterin tapsyrǵan oblys ákiminiń orynbasary Tilepbergen Kaıýpovtyń málim etkenindeı, atalǵan baspana iri kompanııalar, kásipkerler, bankterden kelip túsken qarajat esebinen satyp alynyp, berilip jatyr. Mundaı jumystar kezeń-kezeńmen atqarylyp jatyr.
«Oblys boıynsha tehnıkalyq tekserý júrgizilgen 5 927 úıdiń 1 383-i jaramdy dep tanyldy. Qalǵan 3 023 úı jaramsyz dep tanylsa, sonyń 2 520-sy – Oral qalasyndaǵy saıajaı qurylystary. Óńirde 775 úı jańadan salynatyn bolsa, 2 248 úıdi satyp alý kózdeldi. Kúni búgin 1 013 páter satyp alynsa, sonyń 101-i aýdandarda, 912-si Oralda berildi. Osyǵan deıin úıleri sýǵa ketkendikten, evakýatsııalyq pýnktterde, jaldamaly páterlerde turyp kelgen saıajaı turǵyndary baspanaly bolyp, qýanyp jatyr», - deıdi T.Kaıýpov.
Sonymen qatar jalǵyz baspanasy sýǵa ketken saıajaı turǵyndary úshin qalanyń «Juldyz» shaǵynaýdanynda, Derkól jáne Zachagan kentterinde jeke úıler salynyp jatyr. T.Kaıýpov sondaı-aq Syrym aýdany ortalyǵy Jympıty aýylynda 14 úıdiń kiltterin tabys etý rásimine de qatysyp, jańa baspana ıelerin qýanyshymen quttyqtady. Onyń aıtýynsha, aýdandarda salynyp jatqan 401 úıdiń 74-i (60-sy – Bórli aýdanynda) paıdalanýǵa berildi.
«Jańa úılerdiń barlyǵyn da jergilikti kompanııalar salyp jatyr. Qazirgi tańda Bórli, Qaratóbe, Terekti, Syrym jáne Báıterek aýdandarynda qurylysqa 115 tehnıka, 1 160 adam tartylǵan. Merdigerler qurylys materıaldaryn óz óńirimizden alyp jatyr», - dedi Kazinform tilshisine T.Kaıýpov.
Eske sala keteıik, budan buryn Batys Qazaqstanda sý tasqyny saldarynan 6 myńǵa jýyq úıge zalal kelgenin jazǵan edik.