Oral qalasynda turǵyn úılerge jylý qashan qosylmaq
«Jaıyqjylýqýat» AQ bas dırektory Baqytjan Ákimǵojınniń óńirlik kommýnıkatsııalar qyzmeti alańynda ótken brıfıngte málim etkenindeı, atalmysh mekeme 1 674 nysandy, sonyń ishinde 1 215 turǵyn úıdi jylý qýatymen qamtamasyz etedi.
Baqytjan Ǵanıulynyń sózine qaraǵanda, 644 úıge PIK jáne basqarýshy kompanııa qyzmet kórsetse, 336 úıdiń basqarý nysany joq (ıesiz). 103 úıde múlik ıeleriniń birlestigi qurylsa, 106-synda jaı seriktestik jáne 26 jeke úı bar.
«Turǵyn úılerdiń barlyǵynda derlik gıdravlıkalyq synaý jáne ishki jylytý júıelerin jýyp-shaıý jumystary júrgizildi. Aýa temperatýrasy úsh táýlik ishinde +8S jáne odan tómendegen kezde turǵyn úıler jylýǵa qosylady. «Qazgıdromet» málimetine qaraǵanda, 11 qazannan bastap kún sýytady. Sondyqtan aldaǵy aptada turǵyn úılerdi jylýǵa qosý kózdelgen», - dedi B.Ákimǵojın.
Bas dırektordyń aıtýynsha, «Jaıyqjylýqýat» AQ sondaı-aq 42 balabaqsha, 38 oqý orny, 47 mektep, 35 densaýlyq saqtaý nysany, 5 áleýmettik qorǵaý, 24 mádenıet nysanyn jylýmen qamtamasyz etedi. Qazirgi kezde ótinimderge sáıkes, mektep, balabaqsha, medıtsına mekemelerine jylý berilip jatyr.
«Jylytý maýsymynda bolýy múmkin apattyq jaǵdaılardy joıý úshin avarııalyq-dıspetcherlik qyzmet (12 adam), 42 qyzmetkerden turatyn avarııalyq-tehnıkalyq komanda jáne erikti órtke qarsy quralym (25 adam) táýlik boıy jumys isteıdi. Jeke quram barlyq qajetti materıaldarmen, quraldarmen, arnaıy kıimmen qamtamasyz etilgen. Sonymen birge jylý-qýat ortalyǵy aýmaǵynda kóshpeli tehnıkasy bar órt sóndirý bólimi ornalasqan. Arnaıy ınjenerlik tehnıka daıyndalyp, avtokólik jumysyna qajetti janar-jaǵar maıdyń avarııalyq qory jasaldy», - dedi B.Ákimǵojın.
Onyń málimeti boıynsha tutynýshylardyń jylý qýaty úshin debıtorlyq bereshegi – 314,35 mln teńge. Sonyń ishinde turǵyndar 296,65 mln, bıýdjettik uıymdar 4,11 mln, basqa tutynýshylar 13,59 mln teńge bereshek bolyp otyr.
Eske sala keteıik, budan buryn Batys Qazaqstanda energetıka salasyn jańǵyrtý baǵytynda ne istelip jatqanyn jazǵan bolatynbyz.