Oral qalasynda qar tazalaý jumystary júrgizilip jatyr
Oral qalasy ákiminiń orynbasary Jandos Dúısenǵalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, 22 qarasha kúni «Qazgıdromet» RMK-nyń málimeti boıynsha 12 mm jaýyn-shashyn túsken.
Onyń sózine qaraǵanda, sońǵy táýlikte qaladan 480 tekshe metr qar shyǵaryldy.
«Jaıyq taza qala» JShS qala aýmaǵy men Zachagan, Derkól, Krýgloozernyı kentterin qardan tazalasa, Jelaev selolyq okrýginde kelisimshartqa sáıkes «Maqsotov» JK osy jumyspen aınalysady. Atalǵan kommýnaldyq mekemelerden 200-ge jýyq arnaıy tehnıka, 360 qyzmetker jumyldyrylǵan. Qar «Asan», sondaı-aq Zachagan kentindegi «Balaýsa» jáne teleortalyq mańyndaǵy polıgonǵa shyǵarylady.
«Qalany qardan tazalaý jumystary aldymen magıstraldy kóshelerde júrgiziledi. Sonymen qatar áleýmettik nysandardyń, mektep, balabaqsha, aýrýhana, emhanalardyń joldary, aıaldama aýmaqtary, trotýarlar men jaıaý júrginshi joldary qardan tazartylady. Munan keıin qalanyń basqa da kósheleri men aýmaqtarynda tıisti jumystar atqarylady», - dedi J.Dúısenǵalıev.
Onyń aıtýynsha, BQO qalalary men eldi mekenderiniń aýmaqtaryn abattandyrý qaǵıdalaryna sáıkes nysandardyń menshik ıeleri irgeles aýmaqty sanıtarlyq tazalaýdy qamtamasyz etedi (barlyq jaǵynan 5 metr). Monıtorıngtik toptyń qyzmetkerleri abattandyrý erejelerin buzý faktisi boıynsha kúndelikti reıdtik sharalar júrgizedi. Buzýshylyq anyqtalǵan kezde zańdy nemese jeke tulǵaǵa joıý merzimi kórsetilgen habarlama beriledi. Jyl basynan beri QR Ákimshilik quqyqbuzýshylyq kodeksiniń 505-babyna sáıkes 4 298 eskertý berilip, 1 mln 369,340 myń teńge kóleminde 41 aıyppul salyndy.
Qala ákimdiginen túsken málimetke qaraǵanda, qazirgi ýaqytta shahar boıynsha 1 036 abonent jaryqsyz otyr. Muny qalypqa keltirý úshin 10 jóndeý toby jáne 2 apattyq brıgada jumys jasaýda. Barlyǵy 40 qyzmetker men 12 arnaıy tehnıka jumyldyrylǵan. Elektr jaryǵyn búgin berý kózdelýde.
Eske sala keteıik, budan buryn Oralda aýa raıyna baılanysty ushaqtar ushpaı jatyrǵanyn jazǵan bolatynbyz.
Sondaı-aq Batys Qazaqstanda elektr jelileri úzilip, joldar jabyldy.