Oral qalasynda baspanasy sýǵa ketken turǵyndar úshin 450 jeke úı salynady

<p>ORAL. KAZINFORM &ndash; Oral qalasynda sý tasqyny saldarynan keltirilgen shyǵyndy óteý boıynsha komıssııa óz jumysyn júrgizip jatyr.</p>

Oral qalasy ákiminiń orynbasary Azamat Halelovtiń málim etkenindeı, komıssııaǵa turǵyndardan shyǵyndy óteý jóninde 10 492 ótinish túsken.

Onyń sózine qaraǵanda, 4 myńǵa jýyq saıajaı turǵynynyń úıi jalǵyz baspana retinde tanylǵan. 

«Sonyń ishinde úsh myńǵa jýyq turǵynǵa baspana beriletin bolsa, 1 myńǵa jýyq úıge jóndeý júrgizilmekshi. Kúni búgin tehnıkalyq zertteý mekemelerimen 3 myń azamattyń mekenjaılary boıynsha tekserý júrgizildi. Oǵan qosa 10 myńnan astam turǵynǵa 150 AEK kóleminde birjolǵy áleýmettik kómek kórsetiledi. Osy kezge deıin komıssııa 2700-deı materıaldy qarap, 500-ge jýyq otbasyna úı berý jóninde sheshim shyqty. Birinshi kezekte áleýmettik osal toptaǵylarǵa, atap aıtqanda, kóp balaly, tolyq emes otbasylarǵa, múmkindigi shekteýli adamdarǵa baspana kiltteri berilip otyr», - dedi A.Halelov. 

Taǵy bir aıta keter jaıt, jeke úılerde turǵysy keletin turǵyndardyń da talap-tilegi eskerildi.

«Osyǵan sáıkes qalanyń shaǵyn aýdandarynda 450 jeke úı salynady. Qazirgi kezde úıler merdiger mekemelerge bólinip berildi, irgetasy quıylyp jatyr. Bul úılerdi jańa oqý jyly bastalǵanǵa deıin salyp bitirý kózdelip otyr», - dedi A.Halelov.

Qala ákiminiń orynbasary Jandos Dúısenǵalıevtiń aıtýynsha, barlyǵy 8 myńdaı saıajaı úıiniń 4 myńdaıyna múliktik baǵalaý jumystary júrgizildi.

«Múliktik baǵalaýǵa turmystyq tehnıkalar, jıhazdar kiredi. Kúni búgin 1377 úı boıynsha sheshim shyǵarylyp, 600 mıllıondaı teńge tólendi», - dedi J.Dúısenǵalıev.

Eske sala keteıik, budan buryn Oralda sýǵa ketken 2600-den astam turǵyn úıge tehnıkalyq tekserý jumystary júrgizilgenin jazǵan bolatynbyz.