Oral qalasynda 8,6 mlrd teńgege 100-den astam shaqyrym joldy jóndeý kózdelip otyr

<p>ORAL. KAZINFORM &ndash; Oral qalasynda bıyl jalpy uzyndyǵy 107,6 shaqyrym joldy jóndeý josparlanyp otyr.</p>

Oral qalasy ákiminiń orynbasary Jandos Dúısenǵalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde 9,05 km jolǵa (5 joba) kúrdeli jóndeý, 4,3 shaqyrymǵa (5 joba) qaıta qurý, 66,4 shaqyrymǵa (21 joba) ortasha jóndeý jáne 27,8 km jolǵa (5 joba) ANT ádisimen aǵymdaǵy jóndeý jumystary júrgizilmek.

Foto: Oral qalasynyń ákimdigi

Jandos Ashatulynyń sózine qaraǵanda, atalǵan jobalardy júzege asyrý úshin 8,6 mlrd teńge qarajat qajet.

Budan bólek, 2023 jyly bastalǵan 8 joba boıynsha jol jóndeý jumysy bıyl aıaqtalady (qalǵany 18 km).

Foto: Oral qalasynyń ákimdigi

«Sáýir aıynyń sońynan bastap kóshe joldaryn aǵymdaǵy jáne ortasha jóndeý bastaldy. Qyzyljar jáne Nekrasov pen Lermontov kóshelerin ortasha jóndeý tolyq aıaqtaldy, qazir tıisti jumys Nazarbaev dańǵylynda jáne Alash kóshesinde júrgizilýde. Ortasha jóndeýmen negizgi ári kólik kóp júretin kósheler qamtylady. 50-den astam kósheni aǵymdaǵy jóndeý kózdelse, sonyń 20-synda jumys máresine jetti. Oǵan qosa kópirlerdegi deformatsııalyq tigisterdi qalypqa keltirý, temir jol ótkelderin jóndeý júrgizilip jatyr», dedi J.Dúısenǵalıev.

Foto: Oral qalasynyń ákimdigi

Qala ákimi orynbasarynyń aıtýynsha, sonymen qatar jol qozǵalysyn retteıtin tehnıkalyq qurylǵylar ornatylyp, jóndeledi. Atap aıtqanda, 10 orynǵa jaıaý júrginshiler ótkeli kompo-belgisi, 20 jasandy jol tegis emestigi (IDN), 7 jaıaý júrginshilerge arnalǵan shaqyrý túımesi bar baǵdarsham, 4 kóshe qıylysyna baǵdarsham, 5 orynǵa proektsııalyq jaıaý júrginshiler ótkelin ornatý kózdelgen. Qazirgi kezde qala boıynsha jol tańbalaý jumystary atqarylýda. 2024 jyly barlyǵy 132 kóshe joly tańbalanbaq.

Foto: Oral qalasynyń ákimdigi

«Bıyl qalada sý tasqynyna oraı tótenshe jaǵdaı jarııalanǵany belgili. Qazir sý tasqynynyń saldaryn joıý jumysy jalǵasýda. Sondyqtan jol jóndeýge qatysty keıbir jobalar júzege aspaýy múmkin. Degenmen múmkindiginshe jol jóndeýdi josparǵa saı atqarýǵa tyrysamyz», dep túıindedi sózin J.Dúısenǵalıev.

Oral qalasynda avtomobıl joldarynyń jalpy uzyndyǵy 690,3 shaqyrym bolsa, sonyń 439,6 shaqyrymy nemese 63,7 paıyzy – jaqsy jáne qanaǵattanarlyq kúıde, 250,7 shaqyrymy (36,3 paıyzy) – topyraq jabyndy joldar.

Foto: Oral qalasynyń ákimdigi

Eske sala keteıik, budan buryn BQO-da turýǵa jaramsyz dep tanylǵan 456 úıdi qalpyna keltirý jumystary bastalǵanyn jazǵan bolatynbyz.

Batys Qazaqstanda shyǵynǵa ushyraǵan 1 myń bas malǵa ótemaqy tólendi.