Oral qalasy men 80-nen astam eldi mekendi sý basý qaýpi áli de joǵary
«Qazirgi ýaqytta Batys Qazaqstan oblysynda sý tasqynynyń ekinshi kezeńine daıyndyq jumystary kúsheıtilgen rejımde júrip jatyr. Jaǵdaı áli de kúrdeli. Sebebi kórshiles Reseıdiń Orynbor oblysynan keletin sý kózderinen Jaıyq ózenine sý kóp kólemde túsýde. Sýdyń kóbeıý qarqyny jyldam. Osynyń saldarynan Aqjaıyq, Bórli, Báıterek, Terekti aýdandarynyń 80-nen astam eldi mekenin, sonymen qatar Jaıyq ózeni boıynda ornalasqan Oral qalasy aýmaǵyn sý basý qaýpi bar. Qazir oblys ortalyǵynyń shetindegi 900-ge jýyq saıajaı sý astynda qaldy», - dedi ol Ortalyq kommýnıkatsııalar qyzmetindegi brıfıngte.
Onyń aıtýynsha, mamandar Orynbor oblysynan keletin sý 17-19 sáýir kúnderi Batys Qazaqstan aımaǵyna jetetindigin boljap otyr.
«Osyǵan baılanysty sý tasqynynyń aldyn alý maqsatyndaǵy jumystar táýlik boıy atqarylyp jatyr. Búginde oblys boıynsha Jaıyq jaǵasynda uzyndyǵy 72 shaqyrym bolatyn damba salynyp, ózen jaǵasy nyǵaıtyldy. Barlyq jumys BQO ákimi Narıman Tóreǵalıevtiń tikeleı baqylaýynda. Oblys ákimi kúndelikti qaýip tónip turǵan aımaqtarǵa baryp, barlyq sý tasqynyn aldyn alý jumystaryna jetekshilik etip júr. Qazirgi ýaqytta ózen boıynda qaýip tónip turǵan eldi mekenderden turǵyndar evakýatsııalanyp jatyr. Adamdardy qaýipsiz jerge ornalastyrý úshin syıymdylyǵy 8 596 orynǵa laıyqtalǵan 161 ýaqytsha ornalastyrý pýnkti daıyndaldy. Oblys boıynsha mundaı pýnktterde 2 myńǵa jýyq adam ornalasty. Olarǵa qajetti zattar men azyq-túlik, kıim-keshek ýaqyty jetkizilip jatyr. Turǵyndardyń shyǵynyn esepteý jónindegi komıssııa jumys isteýde. Búginde 677 otbasyǵa 125 mln teńge kóleminde birrettik áleýmettik kómek berildi. Bul jumys aldaǵy ýaqytta da jalǵasady. Sonymen qatar qaıyrymdylyq qorlary, kásipkerler, jeke tulǵalar tarapynan 300 mln teńgege jýyq gýmanıtarlyq kómek kórsetildi», - dedi Erhan Tátken.