ORAL. KAZINFORM — Batys Qazaqstan oblysynyń ákimi Narıman Tóreǵalıev tasqyn sýdyń aldyn alý boıynsha oblystyq jedel shtabtyń otyrysyn ótkizdi.
Otyrys barysynda oblysqa qarasty qalalar men aýdan ákimderi sý tasqynynyń aldyn alýǵa baǵyttalǵan jumystary týraly baıandady. Shtab otyrysynda oblys ákimi Oral qalasynyń ákimi Mırjan Satqanovqa qatań sógis jarııalady.
«Sý tasqynyna daıyn bolmaǵansyńdar. Qala ákimdigi ǵımaratynyń ózi sýǵa ketken. Bunyń bári jaýapkershiliktiń joqtyǵyn bildiredi. Keshe jáne búgin qalany aralap júrmin, keıbir shaǵyn aýdandarda men kelgende ǵana jumys bastalyp jatty. Oral qalasy ákimine qatań sógis jarııalaımyn. Sondaı-aq birqatar áleýmettik nysandarǵa sý kirgen. Qala men aýdandar kúsheıtilgen rejımde jumys isteýleri kerek. Jaǵdaıdy 24 saǵat boıy baqylaýda ustańdar», - dedi oblys ákimi.
Eske sala keteıik, budan buryn Batys Qazaqstanda 500-den astam úı men 15 kásiporyn gazsyz qalǵanyn jazǵan bolatynbyz. Sondaı-aq Oral qalasynda birneshe nysan men 5 kópqabatty úıdiń jertólesine sý kirdi.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).