Oral halyqaralyq áýejaıy nelikten reseılik kompanııa basqarýyna berildi – ákimniń jaýaby
Ortalyq kommýnıkatsııalar qyzmetindegi baspasóz máslıhatynda BAQ ókilderi ákimnen: «Buǵan deıin Batys Qazaqstan oblysynda Mánshúk Mámetova atyndaǵy halyqaralyq áýejaıdy reseılik olıgarhtyń senimgerlik basqarýǵa alǵany úlken daý bolǵan. Endi muz aıdyny, at sporty mekemesi, «Aq Jaıyq» fýtbol klýbynyń stadıony sııaqty nysandar osyndaı jolmen jeke qolǵa ótipti. Osynyń saldarynan qazir sportshylar ózderine yńǵaıly ýaqytta jattyǵa almaı júr eken. Memleket qarjylandyratyn bul nysandardy senimgerlik basqarýǵa alǵan kimder? Reseılikter me? Ne sebepti bul máseleni oblys ákimdigi sheshe almaı otyr?» - dep suraǵan edi.
Oblys basshysynyń málimetinshe, Oral áýejaıy eskirgen. Jalpy, áýejaı 2009 jyldan beri jeke kompanııanyń senimgerlik basqarýynda bolǵan.
«Áýejaı termınaly búgingi kúnniń talaptaryna sáıkes kelmedi. Soǵan baılanysty ushyp-qonýǵa nemese keıbir áýe reısterin ashýǵa múmkindik bolmady. Eń qıyny, jolaýshylar jertólege túsip baryp ushaqqa otyratyn edi. Tómen túsýge múgedek jandardyń, balaly analardyń esh múmkindigi bolmady», - dedi óńir basshysy.
Onyń atap ótýinshe, áýejaıǵa 6,6 mlrd teńgege jóndeý jumystary júrgizilgen. Alańy 10 myń sharshy metrge ulǵaıtylǵan.
«Nege Reseı kompanııasy? Jalpy, ózderińiz biletin bolarsyzdar, bul áýejaıdyń jyry birazdan bere kele jatyr. Búginde reseılik «Retrans» kompanııasynyń áýejaıda 49 paıyz úlesi bar. 49 paıyzy Qazaqstan azamaty Dáýlethan Qılybaevqa tıesili. Qalǵan 2 paıyzy da Qazaqstan azamatynda, ıaǵnı, 51 paıyzy bizde. Ol – basqarýshy kompanııa. Demek, áýejaıdyń ushyp-qoný jolaǵy, termınaly memleket menshiginde. Olardyń menshiginde tek qana ushaq ushyp kelgende burylatyn shaǵyn ýchaske men turaq bar. Qalǵan barlyq strategııalyq nysan memleket menshiginde», - dedi Narıman Tóreǵalıev.
Onyń atap ótýinshe, muz aıdyny, stadıon syndy nysandar básekelestik ortada bolýy tıis.
«Búginde muz aıdyny qatelespesem Rýbtsov degen azamatta. Sol azamatqa 2021 ne 2022 jyly senimgerlik basqarýǵa berildi. Qazir jumys istep jatyr. Biz senimgerlik basqarýǵa alǵan kompanııalardyń aldyna naqty tapsyrmalar qoıyp otyrmyz. Olar jumys isteımiz dep aldy... Olar kelisimge sáıkes talaptardy oryndaýy kerek. Eger kelisimshartta kórsetilgen talaptar oryndalmasa, halyqqa sapaly qyzmet kórsetpese, onda memleket nysandy qaıtaryp alýǵa quqyly, ıaǵnı memlekettiń ondaı qyzmeti kózdelgen. Nysandar jekege ótip ketken joq. Ýaqytsha senimgerlik basqarýǵa berildi», - dedi oblys basshysy.