Oral halyqaralyq áýejaıy memleket teńgeriminde – ákimdik jaýap berdi
BQO jolaýshylar kóligi jáne avtomobıl joldary basqarmasynyń basshysy Aıdar Meńeevtiń óńirlik kommýnıkatsııalar qyzmeti alańynda ótken brıfıngide málim etkenindeı, atalmysh strategııalyq nysannyń ushý-qoný jolaǵy – QR Indýstrııa jáne ınfraqurylymdyq damý mınıstrligi Azamattyq avıatsııa komıtetiniń, jolaýshylar termınaly (áýejaı ǵımaraty) – «Aqjaiyq» ÁKK» AQ teńgeriminde.
Onyń aıtýynsha, áýejaı termınaly ǵımaraty «Qarashyǵanaq Petrolıým Opereıtıng b.v.» kompanııasynan bólingen 6,6 mlrd teńgege rekonstrýktsııalaýdan ótken. Sodan keıin «Aqjaiyq» ÁKK» AQ 2022 jylǵy 6 sáýirdegi múlikti senimdi basqarý shartyna sáıkes atalmysh nysandy 3 jyl merzimge «Oral» halyqaralyq áýejaıy» JShS-niń senimdi basqarýyna berdi.
«Qolda bar aqparatqa sáıkes sońǵy jyldary «Oral» halyqaralyq áýejaıy» JShS áýejaılardy basqarýǵa mamandandyrylǵan seriktesterdi izdeý jumystaryn belsendi júrgizgen. Sonyń nátıjesinde áýejaılardy damytýda tájirıbesi bar «Oral Aeroport Holdıng» JShS basqarýshy kompanııasy ınvestor retinde tartylǵan. Kompanııanyń negizgi qatysý úlesi Qazaqstan tarapyna tıesili», dedi A.Meńeev.
Basqarma basshysynyń sózine qaraǵanda, «Oral» halyqaralyq áýejaıy» JShS jańa menshik ıeleriniń tabysty tájirıbesi men qarjylyq múmkindikterin eskere otyryp, jańa basqarýshy kompanııanyń aldyna mynadaı mindetter qoıylmaqshy. Atap aıtqanda, halyqaralyq áýejaıdyń tolyqqandy jumys isteýi úshin qajetti jabdyqty ornatý («ıAntar» radıoaktıvti materıaldardy anyqtaýdyń statsıonarly júıesi, lentaly transporter, konteınerler men palletterdi tasymaldaýǵa arnalǵan telejkalar), nysandy materıaldyq-tehnıkalyq jaraqtandyrýdy jaqsartý (jolaýshylardy ushaqqa/ushaqtan jetkizýge arnalǵan avtobýstar, jolaýshylardy tasymaldaýǵa arnalǵan ambýlıft ornatý) qajet. Sondaı-aq BQO turǵyndarynyń iskerlik jáne týrıstik baılanystaryn keńeıtý, bıletter qunyn arzandatý úshin avıakompanııalar, áýe qatynastary men baǵyttary sanyn ulǵaıtý, termınaldyń júk avıakargosyn salý jáne uıymdastyrý múmkindigi úshin áýejaıdyń ınfraqurylymyn (rýlejka jáne perron) jańǵyrtý kerek. Osyndaı mindettemeler múlikti senimdi basqarý shartyna sáıkes oryndalǵan jaǵdaıda senimdi basqarý merzimi uzartylady, termınaldy jańǵyrtýǵa jumsalǵan qarjyny qaıtarý máselesi de sol kezde sheshiledi.
«Áýejaıdyń strategııalyq nysan retinde qyzmeti jáne ony basqarýmen baılanysty jaǵdaı memlekettiń baqylaýynda, tıisinshe alańdaýshylyqqa negiz joq», dedi A.Meńeev.
«Aqjaiyq» ÁKK» AQ» basqarma tóraǵasy Nurjan Ótepbaev «Oral» halyqaralyq áýejaıy» JShS-nyń menshik ıeleri ózgergenimen, strategııalyq nysannyń memleket menshiginde qalatynyn jetkizdi.
Eske sala keteıik, budan buryn Oral halyqaralyq áýejaıyn baqylaý quqyǵy qazaqstandyq ınvestorlarda qalatynyn jazǵan bolatynbyz.