Oppozıtsııaǵa qurmetpen qaraýymyz qajet - Pýtın

ASTANA. QazAqparat - RF basshysy Vladımır Pýtın «Edınaıa Rossııa» partııasyn problemalardy ádil belgilep, eldiń damýyna kedergi jasaıtyn máselelerdi sheshýde tabandylyq tanytýǵa úndedi, dep xabarlaıdy QazAqparat tilshisi TASS-qa silteme jasap.

«Eń bastysy, sheshilmegen problemalardy ádil belgilep, alǵa qaraı júrýge kedergi jasaıtyn máselelerdi tabandylyqpen sheshý kerek. Úlken maqsattardy qoıyp, naqty nátıjege jetýge tyrysý qajet. Alda mańyzdy ári kezek kúttirmeıtin jumystar kóp. Al osy ýaqytqa deıin jasalǵannyń bári tek fýndament qana, onyń ózi aldaǵy tabysty damýǵa kepil bola almaıdy», - dedi V.Pýtın partııa sezinde.

Onyń oıynsha, osy ýaqytqa deıin budan da joǵary jetistikterge jetýge bolatyn edi. Alaıda aýyr mindetterdi arqalap, úlken maqsattarǵa umtylǵanda iske aspaı qalatyn josparlar da bolady.

Óz sózinde Reseı prezıdenti «Edınaıa Rossııa»-nyń qalyptasý jolyndaǵy qıynshylyqtardy eske alyp, saıası júıeni damytý qajettigine toqtaldy. Osy oraıda ol xalyq arasynda patrıotızm, ulttyq kelisim, salt-dástúrge qurmet, adam quqyqtary sııaqty qundylyqtardy saqtaý máselesine basa nazar aýdardy. Pýtınniń aıtýynsha, Reseıde demokratııany damytý sharalaryn jalǵastyryp, jumys isteı alatyn oppozıtsııaǵa qurmetpen qaraý qajet.

«Bizge tikeleı demokratııa tetikterin keńeıtý kerek dep bilemin. Azamattyq qoǵamnyń áleýetin barynsha ashý qajet. Konstıtýtsııamyz oǵan tolyq múmkindik berip otyr. Básekeni yntalandyrǵan jón. Utymdy usynystarǵa oń kózqaraspen, jumys isteı alatyn oppozıtsııaǵa qurmetpen qaraýymyz qajet. Ondaı oppozıtsııa bılikpen qur daýlasa bermeı, naqty usynystardy jasaýy tıis», - dep atap kórsetti Pýtın.

Onyń oıynsha, azamattyq qoǵam da bos sóz ben popýlızmge jol bermeýi tıis. Budan bólek, Vladımır Pýtın sybaılas jemqorlyqpen kúres máselesine de basa nazar aýdardy.