Operatorlar qazaqstandyqtardyń jeke derekterin saqtandyrýǵa mindetteledi

<p>ASTANA. KAZINFORM &mdash; Tsıfrlyq damý, ınnovatsııalar jáne aeroǵarysh ónerkásibi mınıstrligi aqparattyq qaýipsizdik komıtetiniń tóraǵasy Rýslan Ábdiqalyqov qazaqstandyqtardyń jeke derekterin kúzetýdiń jańa tásili engiziletinin málim etti.</p>

«1 mıllıonnan astam jeke derekterdi óńdeıtin operatorlarǵa mindetti kıbersaqtandyrý engzýdi josparlap otyrmyz. Bul da avtokólik saqtandyrýy sııaqty. Onyń máni kólik ıelerin yqtımal jol apattarynan saqtandyrý. Osy tásildi kıbersalada qoldanbaqshymyz. Mysaly, qandaı da bir uıym jeke derekterdi urlatyp alsa, sonyń saldarynan jeke derek ıeleri shekken zııandy saqtandyrý kompanııalary tóleıdi. Al ondaı qatelik jibergen operator kelesi jyly mindetti saqtandyrýdyń tólemine óte úlken soma óteıdi degen sóz», — dedi ol ortalyq kommýnıkatsııalar qyzmetinde ótken baspasóz máslıhatynda. 

Komıtet basshysynyń aıtýynsha, mundaı júıe qarapaıym azamattardy kompanııalarmen sottasý aýyrtpalyǵynan bosatady.

«Bul, birinshiden, operatorlardy jeke derekterdiń qaýipsizdigine kóbirek kóńil bólýge ıtermeleıdi. Ekinshiden, bul jeke deregi urlanǵan azamattar árbir jaǵdaı boıynsha qandaı da bir kompanııamen sottasyp júrmeıtindeı órkenıetti júıe qalyptastyrýǵa múmkindik beredi. Bizdiń elde ondaı sottar óte uzaqqa sozylady jáne kúrdeli ótedi», — dedi Rýslan Ábdiqalyqov.