Operatsııalyq tıimdilik nátıjesinde «Samuryq-Qazyna» qory 200 mlrd. teńge únemdemek

ASTANA. QazAqparat - «Samuryq-Qazyna» UÁQ 2020 jylǵa qaraı operatsııalyq tıimdilikti kóterý esebinen 200 mlrd. teńge únemdemek. Bul týraly «Samuryq-Qazyna» Ulttyq Ál-aýqat Qory» AQ basqarma tóraǵasy Ómirzaq Shókeev «Qazposhta» AQ dırektorlar keńesi jáne qyzmetkerlerimen ótken keńeste málim etti.

Basqarma tóraǵasynyń aıtýynsha, Qor tarapynan sońǵy eki jylda shyǵystardy qysqartyp, kiristerdi arttyrýǵa qatysty 8 bastama usynylǵan. Bul rette Ó. Shókeev rezervter bar ekenin, muny qoldaný qıyn emes ekenin alǵa tartady. «Eger eseptep qarasaq, operatsııalyq tıimdilikti bar-joǵy 2 paıyzǵa arttyrýdyń nátıjesinde 90 mıllıard teńge únemdeledi eken. Al biz 2020 jylǵa qaraı ony 5 paıyzǵa arttyrýdy mindet etip otyrmyz. Ózderińiz qarańyzdar, bul shamamen 200 mıllıard teńgeniń únemdeletinin bildiredi. Munyń ózi tutastaı Atyraý munaı óńdeý zaýytyn jańǵyrtýǵa ketetin qarajat emes pe?» -dedi Ó. Shókeev.

Sonymen qatar, Qor basshysy «Makkenzı» kompanııasymen «Samuryq-Qazyna» jumysyn jaqsartý úshin álemniń basqa uqsas qorlarymen salystyrmaly saraptama júrgizilgenin atap ótti. «Sodan belgili bolǵany, Qordyń tek bir ǵana operatsııalyq tıimdiligin Shvetsııanyń, Frantsýzdyń, Koreıanyń «Tımosek», «Qazyna», «Mýbadala» sekildi uıymdarymen salystyrýǵa bolady eken. Al kapıtaldy paıdalanýdyń rentabeldiligi men ınvestıtsııanyń tıimdiligi boıynsha «Samuryq-Qazyna» olardan aıtarlyqtaı artta qalyp otyr», - deıdi Ó. Shókeev.