OPEK naryqtaǵy jaǵdaıdyń turaqtalýy boıynsha boljamdaryn ózgertti
Vashıngtondaǵy Strategııalyq jáne halyqaralyq zertteýler ortalyǵynda OPEK-tiń bas hatshysy Muhammed Barkındo osyndaı málimdeme jasady, dep habarlaıdy QazAqparat.
TASS agenttiginiń jazýynsha, bas hatshy bul boljamdar 10 jeltoqsanda Venada bekitilgen kelisim negizinde jasalyp otyrǵanyn basa aıtqan. Barkındonyń aıtýynsha, buǵan deıin OPEK turaqtylyq tek 2017 jyldyń III - IV toqsandarynda nemese 2018 jyldyń І-ІІ toqsandarynda ornaıtynyn boljaǵan edi.
Bul rette, Barkındo 2017 jyly munaıǵa kútilip otyrǵan baǵany atamady. Ol OPEK naqty sandardy baǵdarlaýdan bas tartýdy «saıası prıntsıp» etip alǵanyn málimdedi. Alaıda, atalmysh uıymda saraptamalyq baıandamalardy ázirleýge jaýapty Horhe Leon aıtyp bergendeı, OPEK 2017 jyly álemdik munaı baǵasyn barreline $50 shamasynda boljap otyr.
Barkındonyń aıtýynsha, bekitilgen kelisimderdiń oryndalýyn ónimdi baqylaý jónindegi joǵary deńgeıdegi komıtet qadaǵalaıtyn bolady.
«Men atalǵan kelisimniń tolyǵymen jáne óz ýaqytynda oryndalaryna bek senimdimin. Aljırdegi kezdesýge deıin-aq, sarapshylardyń deni bizdiń kelisim ornata alatynymyzǵa shúbá keltirgen edi, biraq bizdiń qolymyzdan keldi», - dedi M.Barkındo.
Aıta keteıik, 30 qarasha kúni OPEK quramyndaǵy memleketter munaı óndirisin qysqartý týraly kelisken bolatyn: 2017 jyldyń qańtar aıynan bastap ol táýligine 1,2 mıllıon barrelge deıin qysqarady.
Al 10 jeltoqsan kúni Venada OPEK-ke múshe emes elder mınıstrleriniń kartelge enbeıtin memleketter ókilderimen kezdesýi ótti. Otyrys alty saǵatqa jalǵasyp, nátıjesinde munaı óndirisin shekteý týraly kelisimge qol qoıyldy. Reseı energetıka mınıstri Aleksandr Novaktyń habarlaýynsha, kelisimge OPEK-ke kirmeıtin 11 memleket qosyldy. Olar alǵashqy jartyjyldyqta munaı óndirisin shamamen táýligine 560 myń barrelge deıin azaıtatyn bolady.
12 jeltoqsa kúni Astanada QR Energetıka mınıstri Qanat Bozymbaev Qazaqstan da munaı óndirisin qysqartatynyn málim etti. «Tómendeý Qazaqstan úshin sımvoldyq desek te bolady. Qazaqstannyń qarashadaǵy táýliktik munaı óndirý kólemi 1,7 mln. tonnany quraǵandyǵyn eskerer bolsaq, 20 myń tonna - bul is júzinde sımvoldyq tómendeý», - dedi ol.
Sondaı-aq mınıstr OPEK-ke kirmeıtin 11 eldiń ishinde Qazaqstan munaı óndirý deńgeıi boıynsha Meksıkadan keıingi ekinshi orynda turǵanyn atap ótti.