OPEK+ mınıstrleri telekonferentsııa ótkizdi

NUR-SULTAN. QazAqparat – OPEK+ elderiniń birqatar mınıstri telekonferentsııa ótkizip, munaı naryǵyndaǵy ahýaldy talqylady, dep habarlaıdy QazAqparat.

Telekonferentsııaǵa QR Energetıka mınıstri Nurlan Noǵaev qatysty.

«Yqpaldastyq týraly Deklaratsııaǵa qol qoıǵan OPEK jáne OPEK-ke enbeıtin elderdiń birqatar mınıstri munaı naryǵynda qalyptasqan aǵymdaǵy jaǵdaıdy talqylaý úshin resmı emes telekonferentsııa ótkizdi...

Mınıstrler 12 sáýir kúni mınıstrler deńgeıinde ótken OPEK-tiń 10-konferentsııasynda (kezekten tys) qabyldanǵan sheshimdi joǵary baǵalady. Olar munaı óndirisiniń kólemine túzetý engizý týraly atalmysh vıdeokonferentsııada qol jetkizilgen kelisimge beıildiligin qýattady», - delingen OPEK+ uıymynyń Facebook-tegi paraqshasynda.

VVS-diń jazýynsha , seısenbi kúni keshke Brent markaly munaıdyń baǵasy bir barreli úshin 18 dollardan tótendedi. Bul, 2002 jyldan beri alǵash bolyp otyr. Londonnyń ICE Futures saýda-sattyq naryǵynda Brent munaıynyń maýsym aıyndaǵy fıýchersteri Nur-Sultan qalasynyń ýaqytymen 22 sáýir, túngi saǵat 00:00-degi jaǵdaı boıynsha, bir barreline 17,78 dollardy qurady. Onyń aldyńǵy sessııamen salystyrǵanda baǵa 7,79 dollarǵa nemese 30,47% arzandady. Buǵan AQSh-tyń mamyr aıynda jetkiziletin WTI munaıyna kelisimshart baǵalarynyń quldyraýy sebep boldy. Onyń baǵasy dúısenbi kúni keshke barrel úshin mınýs 40 dollarǵa deıin tústi. Kelisimshartty jasasqandar olardy satyp alýǵa nıet bildirgenderge ústinen aqsha qosyp berýge daıyn boldy. Qazir maýsym aıynda jetkiziletin WTI munaıynyń fıýchersi bir barreline 7 dollardan da tómen.