Ońtústikten soltústikke qonys aýdarý: Úkimette jańa usynystar pysyqtalady

<p>ASTANA. KAZINFORM &ndash;&nbsp; Úkimette jumyssyzdardyń ońtústikten soltústikke qonys aýdarýyn yntalandyrýǵa qatysty usynystar qaralady. Bul týraly Premer-Mınıstrdiń orynbasary Tamara Dúısenova aıtty.</p>

Búgin Senatta demografııalyq ósý taqyrybyna arnalǵan Úkimet saǵatynan keıin tilshiler Úkimet basshysynyń orynbasarynan ońtústikten soltústikke qonys aýdarý baǵdarlamasy nelikten nátıje bermegenin surady.

«Qazir ońtústikten soltústikke kóshirgende eń negizdi másele retinde jumys oryndarynyń bolýyna nazar aýdaryp otyrmyz. Ekinshiden, baspanamen qamtamasyz etýdi de qarastyryp jatyrmyz. Árıne, biz oıǵandaı úlken kósh bolmaǵanymen, qonys aýdarǵan adamdar jumyspen ári baspanamen qamtamasyz etilip, tabysty bolýy kerek. Búgin Senattaǵy Úkimet saǵatyndaǵy depýtattar biraz usynys berdi. Osy boıynsha tıisti qadamdardy qarastyramyz», - dedi T. Dúısenova.

Onyń aıtýynsha, qazir soltústik óńirlerde jumys oryndaryn kóptep ashýǵa, bul óńirlerde aýqymdy jobalarǵa ekpin qoıylady.

«Jumys oryndary arqyly ǵana azamattardy tarta alamyz. Ońtústik óńirlerdegi jumyssyzdardy soltústik oblystarǵa tek qonys aýdartqannan problema sheshilmeıdi ǵoı?! Sondyqtan ekonomıkalyq turǵyda Úkimette bul máseleni taǵy pysyqtaımyz», - dedi Premer-Mınıstrdiń orynbasary.

Budan buryn habarlanǵandaı, Senat tóraǵasy Máýlen Áshimbaev ońtústikten soltústikke erikti túrde qonys aýdarý baǵdarlamasy tıisti nátıjeni bermegenin aıtty.