Ońtústikten SQO-ǵa qonys aýdarǵan jalǵyzilikti ana jaǵdaıynyń jasalmaı otyrǵanyna narazy

<p>PETROPAVL. KAZINFORM &ndash; Shymkent turǵyny Áıgerim Qalambaeva &ndash; &laquo;Qýatty óńirler &ndash; el damýynyń draıveri&raquo; ulttyq jobasy aıasynda osydan úsh jyl buryn ońtústikten soltústikke qonys aýdarǵandardyń biri. Soltústik Qazaqstan oblysynyń Mamlıýtka qalasynda turyp jatqan jalǵyzilikti ana qysty qorqynyshpen kútip otyr.&nbsp;</p>

Aıtýynsha, kelerde ýádeni úıip tókken jergilikti bılik búginde áıeldiń máselelerine atústi qarap, sheshýge asyǵar emes.

Áıgerim Qalambaeva 2021 jyly eki qyzy, anasymen birge SQO-ǵa qonys aýdarady. Mamlıýtka qalasynan berilgen úıge kirgen otbasynyń qýanyshy uzaqqa barmaǵan. 

«Qysta balalarymmen úsip ketetin shyǵarmyn dep oıladym. Pesh durys salynbaǵan, tartpaıdy. Úıdiń tóbesi de durys jabylmaǵan, aǵashtary bos jatyr. Byltyr aǵash jońqasyn ózim ákelip tósetkizdim. Elektr symdary qalaı bolsa solaı tartylǵan, keı jeri balqyp jatyr. Bir kúni órttenip ketemiz be dep qorqamyn», - deıdi Áıgerim Qalambaeva.

Onyń negizgi mamandyǵy – dene shynyqtyrý pániniń muǵalimi. Biraq qazir saýda oryndarynyń birinde dúkenshi bolyp júr. 

«Mamandyǵym boıynsha jumys istep jatqan joqpyn. Byltyr jalynyp júrip Mamlıýtka sanatorlyq mektep-ınternatyna tárbıeshi bolyp ornalasqanmyn. Sondaı-aq balalar men jasóspirimderdiń dene shynyqtyrý klýbyna ulttyq sport túrlerinen jattyqtyrýshy bolyp qosymsha jumysqa turdym. Biraq, bir jylǵa ǵana aldy. Bıyl taǵy jumyssyzbyn», - deıdi Mamlıýtka turǵyny. 

Mamlıýtka aýdandyq ákimdiginiń málimetinshe, otbasyna kóship kelý shyǵynynyń orny toltyrylyp, 860 myń teńge shamasynda qarajat tólengen. Áıgerimniń ózi jumyspen qamtylyp, anasy Ásııa Arystanqyzy «Bastaý-Bıznes» baǵdarlamasy aıasynda kýrstan ótip, byltyr 1,3 mln teńge grant aldy. Ol qarajatqa áıel 4 iri qara mal alǵan eken. 

«2023 jyly turǵyn úı-kommýnaldyq sharýashylyq bólimi peshti jóndep berdi. Bıyl Mamlıýtka qalasy ákiminiń apparaty elektr symdaryn ishinara aýystyrdy», - delingen osy otbasyna qatysty ákimdik jaýabynda. 

Mamlıýt aýdany Mansap ortalyǵynyń dırektory Erkin Samarhanuly da máselege qanyq bolyp shyqty. 

«Á.Qalambaevamen 02.11.2022 jyly kóship kelýshi retinde shart jasaldy. Mamlıýtka sanatorlyq mektep-ınternatynda, qosymsha ishki saıasat bóliminde, balalar men jasóspirimderdiń dene shynyqtyrý klýbynda jumys istedi. Alaıda tıisti testti tapsyra almady. Mektepten tárbıeshi jumysy qıyn dep óz erkimen shyǵyp ketti. Ol kisiniń máselesi meniń jeke baqylaýymda. Qazir Bilim bólimi basshysymen mektepke dene tárbıesi páni muǵalimi retinde jumysqa alýǵa sóılesip jatyrmyz. Qalada vakansııa az, aýyl jaqqa barsa jaqsy bolar edi, ári eldi mekenge kelgen mamandarǵa kóp tólenedi. Úsh jyl buryn jańa úıdi ózderi tańdap aldy. Árıne, qandaı úı bolsa da jyl saıyn azdap bolsyn jóndeý júrgizip turý qajet qoı. Úı ıesi, ádette ishin aǵartady, syrlaıdy, peshti qaıtadan sylaıdy jáne t.b. jumystary bar. Desek te ol úıge jóndeý jumysyn júrgizý josparda bar», - deıdi Erkin Samarhanuly.

Ortalyq dırektorynyń aıtýynsha, sońǵy úsh jylda Mamlıýt aýdanyna ońtústik óńirlerden 149 otbasy – 589 adam qonys aýdarǵan. 

Buǵan deıin Petropavlda tasqynnan zardap shekken 400-ge jýyq adamnyń áli kúnge ýaqytsha turý oryndaryn panalap otyrǵanyn jazǵan edik.