Ońtústik Koreıaǵa sút jáne Japonııaǵa jylqy eti jetkiziledi – Qazaqstannyń eksporty qanshalyqty ózgerdi

<p>ASTANA. KAZINFORM &ndash; Qazaqstan aýyl sharýashylyǵy ónimderiniń eksportyn damytýǵa ekpin qoıyp otyr, ıaǵnı bul turǵyda álemdik naryqtaǵy ornymyz nyǵaıyp, jetkizý baǵyttary keńeıtilip jatyr. Elimiz birqatar seriktes elderge mal, sút ónimderin, bal, shujyq jáne konservi syndy taýarlardyń keń aýqymyn eksporttap otyr.</p>

Qazaqstandaǵy kompanııalar EAEO, TMD elderine, sondaı-aq Iran, Qytaı, Mońǵolııa, BAÁ jáne Saýd Arabııasyna iri qara men usaq maldy, jylqy jáne túıeni jetkizýmen aınalasyp keledi. 

Osy elderge, sondaı-aq Túrkııaǵa bal jáne bal arasy sharýashylyǵy ónimderi, qus sharýashylyǵy taýarlary, teri, jem-shóp sııaqty ónimder tasymaldanyp jatyr. 

Atap aıtqanda, EAEO men TMD elderine, Iran, Ońtústik Koreıa jáne Qytaıǵa konserviler, shujyq ári sút ónimderi, balyq eksporttalady. Sonymen qatar, qoı jáne jylqy eti EAEO men TMD-ǵa, Iran, Qytaı, BAÁ, Saýd Arabııasy jáne Japonııaǵa jetkizilip otyr. 

Qazaqstandaǵy aýyl sharýashylyǵynyń jalpy taýar aınalymy 2023 jyly 11,3 mıllıard dollardy qurady. Bul kórsetkish 2022 jyly tirkelgen 11,5 mıllıard dollardan sál azdaý boldy. Eksport kólemi 5,35 mlrd dollardy qurady, bul óz kezeginde 2022 jylmen salystyrǵanda 5 paıyzǵa az. Bul rette, Qazaqstannyń aýyl sharýashylyǵy ónimderiniń eksporty syrtqa shyǵarylatyn taýarlardyń jalpy kóleminiń shamamen 7 paıyzyn qurady.

Reseı, Ózbekstan, Qytaı, Aýǵanstan jáne Tájikstan aýyl sharýashylyǵy ónimderi boıynsha Qazaqstannyń bes iri saýda seriktesteriniń qataryna kirdi.

2023 jyly Reseımen taýar aınalymy 3,46 mlrd dollardy, Ózbekstanmen – 1,71 mlrd dollardy, Qytaımen 1,3 mlrd dollardy qurady. Byltyr ShYU elderimen aýyl sharýashylyǵy ónimderiniń jalpy taýar aınalymy 7,7 mlrd dollarǵa jetti.

Qazaqstannyń aýyl sharýashylyǵy ónimderiniń jalpy eksportynyń 70 paıyzy ShYU elderine jiberildi, ıaǵnı onyń somasy 3,8 mıllıard dollardan asty.

Jaqynda QR Aýyl sharýashylyǵy mınıstri Aıdarbek Saparov Qazaqstannyń 80 elge, sonyń ishinde Ortalyq Azııa men EAEO memleketterine aýyl sharýashylyǵy ónimderin jetkizip jatqanyn aıtap ótti. Bul turǵyda elimiz álemdegi eń iri azyq-túlik eksporttaýshylarynyń 25-iniń qatarynda. Keıingi bes jylda aýyl sharýashylyǵy ónimderiniń eksporty eki ese ósip, 5,4 mıllıard dollarǵa jetti. Qazaqstan eksporttyq kórsetkishterin odan ári arttyrý úshin 2029 jylǵa qaraı eksportty eki esege ósirmek.

«Biz osy kórsetkishti odan ári arttyrýdy josparlap otyrmyz. Álemde azyq-túlik tapshylyǵynyń ósýi jaǵdaıynda elimiz 2029 jylǵa qaraı aýyl sharýashylyǵy ónimderiniń eksportyn eki esege arttyrýdy maqsat etip otyr. Bul rette, óńdelý deńgeıi joǵary ónimge basymdyq bere otyryp, eksport qurylymyn belsendi túrde ózgertip jatyrmyz. Óńdelgen ónimderdiń eksporty keıingi 5 jylda eki esege ósip, 2,3 mlrd AQSh dollary deńgeıine jetti. Biz Qazaqstanda birlesken qaıta óńdeý zaýyttaryn ashýǵa múddelimiz. Óz jumysyn ashyq júrgizetin bızneske qoldaý kórsetiledi. Atap aıtqanda, osy saladaǵy is-qımyldar Qazaqstanda jáne EAEO elderinde azyq-túlik qaýipsizdigin nyǵaıta túsedi», - dedi mınıstr. 

Qazirgi kezde mınıstrlik Eýropa odaǵy, Vetnam, Sıngapýr jáne Parsy shyǵanaǵy elderimen eksporttalatyn taýarlardyń qataryn keńeıtý jumystaryn jalǵastyryp jatyr.