Ońtústik Koreıadaǵy batareıa zaýytyndaǵy órtten ondaǵan adam qaza boldy

<p>ASTANA. KAZINFORM &ndash; Ońtústik Koreıada lıtıı batareıalaryn shyǵaratyn zaýytta bolǵan órtten 20-dan astam adam kóz jumdy, dep habarlaıdy Kazinform agenttigi <a href="https://www.bbc.com/russian/articles/cqvvv7y416go" target="_blank" rel="noopener">BBS</a>-ge silteme jasap.</p>

Dúısenbi kúni tańerteń Seýlden 45 shaqyrym jerde ornalasqan Hvason qalasyndaǵy Aricell zaýytynda birneshe batareıa jarylyp, órt shyqty.

Jergilikti telearnaǵa shyqqan vıdeodan kóringendeı, órt sóndirýshiler tilsiz jaýdy aýyzdyqtaýǵa kirisip jatqanda birneshe jarylys bolyp, aınalany qoıý tútin basqan. Ǵımarat shatyrynyń bir bóligi opyrylyp túsken.

Ońtústik Koreıa álemdegi lıtıı batareıalaryn óndirýde jetekshi el. Bul batareıalar elektr kólikterinen bastap noýtbýkterge deıin kóptegen tehnıkada qoldanylady.

Órt sóndirý bóliminiń ókili Kım Djın En qaza bolǵandar arasynda eki ońtústikkoreıalyq jumysshy, 1 Laos jáne 18 Qytaı eliniń azamaty bar ekenin aıtty. Kem degende taǵy bir adam iz-túzsiz joǵalǵan.

Taǵy segiz adam jaraqat alǵan. Onyń ishindegi ekeýiniń jaǵdaıy aýyr. Órt kezinde ǵımaratta barlyǵy 100-ge jýyq adam jumys istep turǵan.

Ázirge jarylysqa naqty ne sebep bolǵany belgisiz.

Osyǵan deıin Ońtústik Koreıanyń ekonomıkalyq ósimi úshinshi toqsanda boljanǵan shamadan da álsiz bolǵanyn jazdyq.