Ońtústik Koreıa Soltústik Koreıanyń 15 IT mamany men bir kompanııasyna sanktsııa saldy

<p>ASTANA.KAZINFORM &mdash; Beısenbi kúni Ońtústik Koreıa Soltústik Koreıanyń 15 IT mamany men bir uıymǵa ıadrolyq qarý men zymyran jasaýdy qarjylandyrýǵa baǵyttalǵan zańsyz kıberqyzmetterge qatysty degen aıyppen sanktsııa jarııalady, dep jazady <a href="https://en.yna.co.kr/view/AEN20241226003051315" target="_blank" rel="noopener">Yonhap</a>.</p>

Sanktsııalar dúısenbi kúni kúshine enedi.

Ońtústik Koreıanyń Syrtqy ister mınıstrligi 15 mamannyń 14-i zańsyz kıber operatsııalar arqyly shetelde tabys tabý úshin jumys istedi degen kúdikke ilingenin habarlady. Bul qarajat KHDR-da ıadro jáne zymyran damytýǵa jumsaldy.

Barlyq mamandar qarý-jaraq óndirýmen jáne osy saladaǵy zertteýlermen aınalysatyn Soltústik Koreıanyń áskerı ónerkásip departamentiniń 313 bıýrosymen baılanysty.

Bıýro soltústikkoreıalyq IT mamandaryn Qytaıǵa, Reseıge, Ońtústik-Shyǵys Azııa men Afrıkaǵa jiberýmen aınalysady degen boljam bar.

Osy bıýromen baılanysy bar taǵy bir maman AQSh pen Kanadadaǵy IT-kompanııalarynda jalǵan atpen jumys istep, Phenıanǵa kólemdi aqsha jibergen.

Ońtústik Koreıa sonymen qatar IT mamandaryn shetelge jiberip, kiristi Soltústik Koreıa rejımine baǵyttady degen kúdikke ilingen Chosun Kum Jong Economics Information Technology Exchange Co. kompanııalaryn sanktsııalar tizimine qosty.

BUU-nyń 2024 jylǵy paneldik baıandamasynda Soltústik Koreıanyń krıptovalıýta urlyǵynan túsken tabystyń 40% jappaı qyryp-joıatyn qarý baǵdarlamalaryna jumsaǵany anyqtaldy.

Aıta keteıik, qazan aıynda KHDR Koreıa Respýblıkasymen avtomobıl jáne temirjol qatynasyn tolyǵymen úzgen bolatyn. Soltústik Koreıa da Ońtústik Koreıany «dushpan memleket» dep jarııalap, bul anyqtamany konstıtýtsııasyna engizdi.

Eske sala keteıik, buǵan deıin Ońtústik Koreıa valıýtasy sońǵy 15 jyldaǵy eń tómengi deńgeıge jetkenin jazǵan edik.