Ońtústik Kavkazdaǵy beıbitshilik Qazaqstan úshin mańyzdy — sarapshy

<p>ALMATY. KAZINFORM — Ońtústik Kavkazdaǵy beıbitshilik Qazaqstannyń múddesine saı keledi. Óńirdegi shıelenisti joıý Qazaqstannyń Ázerbaıjan, Armenııa jáne Grýzııamen olardyń kóliktik-tranzıttik jáne ekonomıkalyq áleýetin barynsha paıdalana otyryp, áriptestigin jandandyrady. Mundaı pikirdi QR Prezıdenti janyndaǵy Qazaqstan strategııalyq zertteýler ınstıtýtynyń eýropalyq jáne amerıkalyq zertteýler bóliminiń jetekshi sarapshysy Marat Ramazanov bildirdi.</p>

Almatyda Ázerbaıjan men Armenııanyń syrtqy saıası vedomstvo basshylary arasyndaǵy kelissózdiń birinshi kezeńi ótti. 

Onda beıbitshilik pen memleketaralyq qatynas ornatý týraly ekijaqty kelisimniń jobasyn daıyndaý máselesi talqylandy. 

Osyǵan baılanysty QR Prezıdenti janyndaǵy Qazaqstan strategııalyq zertteýler ınstıtýtynyń eýropalyq jáne amerıkalyq zertteýler bóliminiń jetekshi sarapshysy Marat Ramazanov oı bólisti.

«Bul úderis óte qıyn bolmaq, óıtkeni Baký men Erevannyń pozıtsııalaryn ózara táýeldi: tikeleı beıbitshilik kelisimi, Ázerbaıjan men Armenııa arasyndaǵy shekaralardy delımıtatsııalaý jáne demarkatsııalaý, sondaı-aq Ońtústik Kavkazdaǵy kólik kommýnıkatsııasynyń buǵatyn ashý sekildi úsh ustanym negizinde jaqyndastyrý qajettiligin eskerý qajet», -deıdi ol.

Aıtýynsha, qalyptasqan oń úrdis pen taraptardyń dıalogty jalǵastyrýǵa daıyndyǵy áli de kelispeýshilik saqtalyp otyrǵan máselelerdi sheshýge múmkindik beredi.

«Beıbitshilikke, tatý kórshilikke jáne Ońtústik Kavkazdyń turaqty damýyna jol ashý elimizdiń múddesine saı keledi. Bul óńirdegi shıelenisti joıý Ázerbaıjan, Armenııa jáne Grýzııanyń kólik-tranzıttik jáne ekonomıkalyq áleýetin barynsha paıdalana otyryp, Qazaqstannyń olarmen áriptestigin jandandyrady», — dep atap ótti sarapshy.

Sonymen qatar, ol kelissózdiń Almaty qalasynda ótýiniń sımvolıkalyq máni bar ekenin aıtty.

Sebebi 1991 jyly jeltoqsanda tarıhı Almaty deklaratsııasyna qol qoıylǵan edi. Ol Ázerbaıjan men Armenııa arasyndaǵy shekarany aıqyndaýdyń negizgi qaǵıdattaryn bekitken asa mańyzdy saıası qujat bolatyn. 

Eske salaıyq, 10 mamyr kúni Ázerbaıjan men Armenııanyń syrtqy ister mınıstrleri kelissóz júrgizýge Almatyǵa kelgen bolatyn. 

Keıin Ázerbaıjan SІM basshysy Qazaqstanǵa beıbitshilik protsesin ilgeriletýdegi qoldaýy úshin alǵys aıtty. 

Aıta keteıik, sáýir aıynda Erevanda ótken kelissóz barysynda Qazaqstan Prezıdenti Qasym-Jomart Toqaev pen Armenııa Premer-mınıstri Nıkol Pashınıan Ońtústik Kavkazda turaqtylyq pen qaýipsizdikti qamtamasyz etý máselesine aıryqsha nazar aýdarǵan bolatyn. 

Sondaı-aq Memleket basshysy, bul kezdesý ázerbaıjan-armıan ýaǵdalastyǵynyń naqty júzege asýyna jol ashyp, jýyq arada Ońtústik Kavkazda turaqty ári uzaqmerzimdi beıbitshiliktiń ornaýyna yqpal etetinin aıtqan edi.