Ońtústiktiń stýdentteri arasynda úzdik fýtbolshylar anyqtaldy

ShYMKENT. QazAqparat - Ońtústik Qazaqstan oblysynda  joǵary jáne orta arnaýly oqý oryndary arasynda fýtzaldan "Stýdenttik lıga" týrnıri ótti. Saıysqa barlyǵy 16 komanda qatysty, dep habarlaıdy QazAqparat tilshisi.

Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý maqsatynda uıymdastyrylǵan jarys óte tartysty ótti. Barlyq komandalar jarysqa jaqsy daıyndyqpen kelgen.

Aqtyq saıysqa Ońtústik Qazaqstan memlekettik pedagogıkalyq ınstıtýtynyń sportshylary men Ońtústik Qazaqstan pedagogıkalyq ýnıversıtetiniń stýdentteri shyqty. Asa tartysty ótken básekede Ońtústik Qazaqstan memlekettik pedagogıkalyq ınstıtýtynyń aıaqdopshylary jeńiske jetip, bas júldeni aldy. Úshinshi oryn Mardan Saparbaev atyndaǵy Ońtústik Qazaqstan gýmanıtarlyq ınstıtýtynyń «Parasat» kolledjiniń sportshylaryna buıyrdy.

Júldeli oryndardan bólek, oıyn barasynda kózge túsken úzdikter de marapattaldy. Ońtústik Qazaqstan polıtehnıkalyq kolledjiniń stýdenti Hýseın Kýraev «Úzdik qaqpashy» atansa, Ońtústik Qazaqstan memlekettik pedagogıkalyq ınstıtýtynyń stýdenti Qanat Les «Úzdik shabýylshy» dep tanyldy. Al Ońtústik Qazaqstan pedagogıkalyq ýnıversıtetiniń stýdenti Salamat Ibragımov «Úzdik oıynshy» ataǵyna ıe boldy.