Ońtústiktiń qara shańyraǵy M.Áýezov atyndaǵy OQMÝ tańdaýy - latyn álipbıi

ASTANA. QazAqparat - Búginde elimizdegi eń ózekti taqyryp, memlekettik tilimizdiń latyn álipbıine kóshý máselesi bolyp otyr. Elbasynyń «Bolashaqqa baǵdar: rýhanı jańǵyrý» maqalasynda latyn álipbıine kóshýdiń mańyzy týraly naqty, ári erekshe atap kórsetilgen. Osyǵan baılanysty jer-jerde osy taqyryp jóninde qyzý talqylaý júrip jatyr. Bul bastamanyń tıimdiligi týraly usynystar da keńinen nasıhattalýda.

Elimizdegi iri joǵary oqý oryndarynyń biri M.Áýezov atyndaǵy Ońtústik Qazaqstan memlekettik ýnıversıtetiniń ujymy da el Prezıdentiniń bastamasyn qoldaıtyndyqtaryn bildirip, «Latyn álipbıine kóshý - ýaqyt talaby» atty dóńgelek ústel otyrysyn ótkizdi. Basqosýǵa "Rýhanı jańǵyrý" baǵdarlamasyn júzege asyrý boıynsha jobalaý keńsesiniń jetekshisi, oblys ákimi apparatynyń bas ınspektory Baqytjan Áshirbaev, M.Áýezov atyndaǵy OQMÝ rektory, t.ǵ.d., professor Jumahan Myrhalyqov bastaǵan ǵalymdar men professor-oqytýshylar quramy jáne stýdentter qatysty.

Jıyn barysynda "Fılologııa" fakýltetiniń dekany, f.ǵ.d., professor Bolat Tileýberdıev jáne "Qazaq tili men ádebıeti" kafedrasynyń dotsenti, f.ǵ.k. Aqjol Qalshabekov, oblystyq ishki saıasat basqarmasy basshysynyń orynbasary M.Álipov baıandama jasap, oılaryn ortaǵa saldy.

Stýdent jastardyń atynan sóz sóılegen Túrikmenstan Respýblıkasynyń azamaty, OQMÝ-dyń 3-kýrs stýdenti Alısher Hamraev «latyn álipbıine kóshý kóptegen múmkinshilikterge, sonyń ishinde álemdik ǵylymǵa jol ashady», degen oıyn bildirdi.