Ońtústiktiń 10 jetistigi: Qaırat Eralıev, TÚRKSOI forýmy, turǵyn úı qurylysy...
Óńirdegi óńdeý ónerkásibi óniminiń kólemi 526,9 mlrd teńgeni qurady, ıaǵnı ótken jylmen salystyrǵanda 5,2 paıyzǵa ósti. Aýyl sharýashylyǵy salasy qarqyndy damyp, 497,8 mlrd teńgeniń ónimi óndirildi. Ortasha aılyq jalaqy kólemi 5,4 paıyzǵa artyp, jyl basynan 72 943 jańa jumys orny ashyldy. Kópqabatty turǵyn úıler paıdalanýǵa berilip, birqatar áleýmettik nysandar ashyldy. Jyl sońynda QazAqparat Ońtústik Qazaqstan oblysynyń 10 jetistigin tizbekteıdi.
1. Túrkistan qalasy túrki áleminiń 2017 jylǵy mádenı astanasy atanyp, kóne shaharda 40-tan astam mádenı sharalar ótti. TÚRKSOI halyqaralyq uıymy turaqty Keńesiniń 35-shi otyrysy uıymdastyryldy.
2. Ońtústik Qazaqstan oblysynyń boksshysy Qaırat Eralıev bokstan álem chempıony atandy. Gambýrgte ótken HІH álem chempıonatynyń 56 kelige deıingi salmaq dárejesindegi jekpe-jekte qazaq uly AQSh boksshysy Dıýk Raganmen kezdesip, aıqyn basymdyqpen jeńiske jetti.
3. Ońtústik Qazaqstan oblysynda alǵash ret «Qazaqstannyń Uly Jibek jolyna saıahat» halyqaralyq festıvali aıasynda eki kúndik «Ontustik Tourism. Invest 2017» týrıstik, ınvestıtsııalyq forýmy ótti. 500-ge jýyq qonaq qatysqan forýmda týrızm salasyndaǵy áleýetti jobalar tanystyrylyp, áleýetti seriktestermen V2V formatynda kezdesýler uıymdastyryldy.
4. Memleket basshysy N.Nazarbaevtyń bastaýymen Ózbekstanǵa resmı saparmen barǵan OQO ákimi kórshi eldiń 3 oblysymen yntymaqtastyq memorandýmyna qol qoıdy. Ógem ózeninen sýdy birigip paıdalaný maqsatynda Ózbekstanmen kelissózder júrgizilip, aýyz sýdy bólip alýǵa kelisim jasaldy. Nátıjesinde, aldaǵy bes jylda Ońtústik Qazaqstan oblysynyń 700 myńǵa tarta halqy bar úsh aýdandy sapaly aýyz sýmen qamtamasyz etiletin bolady. Qazaq-ózbek shekarasynda halyqaralyq mańyzy bar Tashkent-Termez (TM-39) tasjoly men «Syrdarııa» ótkizý beketi ashyldy.
5. OQO-da alǵash ret sala mamandaryna tájirıbe almasý úshin Túrkııaǵa, Ońtústik Koreıaǵa joldama berildi. Ustazdar, dárigerler jáne kommýnaldyq sharýashylyqtyń mamandary men jýrnalıster, ıaǵnı, 300-ge jýyq sala mamandary ozyq tehnologııany meńgerip, sheteldik áriptesteriniń jumysymen tanysyp qaıtty.
6. 2017 jyly barlyq qarjylandyrý kózderi arqyly oblysta 279 turǵyn úıdiń qurylysy júrgizilip, jyl sońyna deıin 109-y, ıaǵnı 5893 páter paıdalanýǵa berildi. Bul ótken jyldyń osy merzimimen salystyrǵanda 4,1 paıyzǵa ulǵaıǵanyn kórsetip otyr.
7. Oblysta bıyl 134 áleýmettik nysannyń qurylysy júrgizildi. Onyń ishinde 82-si jańa bilim berý uıymdary bolsa, 39 densaýlyq saqtaý, 7-ýi mádenıet jáne sport, ózge de 6 nysan bar. «Nurly jol» memlekettik baǵdarlamasy men respýblıkalyq, oblystyq bıýdjet esebinen júrgizilgen bilim nysandarynyń 32-si bıyl el ıgiligine berilse, qalǵan 50 bilim berý ǵımaraty keler jyly tapsyrlady dep josparlanýda. Densaýlyq saqtaý salasynda 39 nysannyń qurylys jumystary júrgizilip, 34 nysan paıdalanýǵa berildi. Al, mádenıet salasynda 4 nysan qurylysy júrgizilip, ekeýi bıyl tapsyrylsa, qalǵan eki nysan qurylysy keler jyly el ıgiligine usynylady.
8. Elimizde árbir besinshi bala Ońtústik Qazaqstanda ómirge keledi. Óńir bala týý men tabıǵı ósim boıynsha respýblıkada alda keledi. Búginde 2 914 054 adam mekendeıtin oblysta halyq sany ótken jylǵa qaraǵanda 10,3 paıyzǵa kóbeıip otyr. Oblys kóleminde 15 myńnan astam jup nekege turǵan bolsa, 59 061 bala dúnıe esigin ashqan. Onyń ishinde 570 egiz ben 4 úshem ómirge kelgen. Bala týý kórsetkishi jóninen Saıram, Saryaǵash, Maqtaaral aýdandary men Túrkistan qalasyndaǵy kórsetkishter joǵary.
9. Astanada ótken «EKSPO-2017» halyqaralyq mamandandyrylǵan kórmesinde Ońtústik Qazaqstan oblysynyń kúnderi joǵary deńgeıde uıymdastyryldy. Ońtústiktiń ónerpazdarynyń qatysýymen 43 mádenı is-shara uıymdastyrylyp, 12 976 tonnaǵa jýyq aýyl sharýashylyq ónimderi usynyldy. Astanalyqtarǵa 450 keli tátti toqash tartý etilip, qala turǵyndary men qonaqtaryna qurt, qymyz-qymran men jemis-jıdekter tegin úlestirdi. Sonymen qatar, «Qazanat» atshabaryndaǵy etnoaýylda qurbandyq shalynyp, 300 keli palaý pisirildi.
10. Ońtústik Qazaqstan oblysynyń boks qurama komandasy 9 kúnge sozylǵan el chempıonatynda jeńimpaz atandy. Ońtústiktiń bylǵary qolǵap sheberleri qarsylastarynan myqty ekendikteri dáleldep shyqty. Sondaı-aq Almaty qalasynda ótken Qazaqstan boks federatsııasy kýbogynyń VIII maýsymdyq jarysynda Ońtústik Qazaqstan oblysynyń boksshylary ekinshi ret Qazaqstan kýbogynyń jeńimpazy atanyp, 25 mln teńgeni jeńip aldy.