«Ońtústikten Soltústikke»: Mamandar Túrkistanda túsindirý jumystaryn júrgizip jatyr
Josparǵa saı delegatsııa quramyndaǵy 40-qa jýyq maman kóshi-qon máselesi týraly tolyqqandy túsindirý jumystaryn júrgizedi, dep habarlaıdy QazAqparat tilshisi.
Búginde Pavlodar oblysynda dáriger, muǵalim jáne tehnıkalyq sala mamandary tapshy. Halyq sany az aımaqqa memlekettik baǵdarlama aıasynda qonys aýdarýǵa nıetti jandarǵa qoldaý da erekshe. Máselen, byltyr Túrkistan oblysynan Pavlodarǵa kóshken 90-ǵa jýyq otbasynyń músheleri jumysqa ornalastyrylyp, baspanamen qamtylǵan. Bul týraly Pavlodar qalasynyń jumyspen qamtý ortalyǵynyń bólim basshysy Ersin Jumashev aıtyp ótti.
«Soltústikke kóshken januıadaǵy árbir adamǵa bir retik 214 myń teńge qarjy beriledi. Aýyl sharýashylyǵyn damytamyn degen sharýalar úshin de jer qunarlylyǵyn atap ótkim keledi. Memleket qoryndaǵy baspanada 5 jyl kóleminde turǵan azamattarǵa úı attaryna rásimdelip beriledi. Ókinishke qaraı, densaýlyǵyna baılanysty aýa raıy jaqpaı nemese otbasylyq jaǵdaılarmen týǵan jerine qaıta oralǵan azamattar bar. Bul bizdiń tarapymyzdan jaǵdaı jasalmaǵandyǵy emes, azamattardyń erikti túrde belgili sebeptermen qaıtý faktisi», - dedi Ersin Jumashev.