Ońtústikten shyǵysqa aǵylǵan kósh jalǵasa ma? - baspasózge sholý
***
Keshe Astanada «Ekspert-200-Qazaqstan» Ulttyq bıznestiń ekonomıkalyq altynshy forýmy bolyp ótti. Oǵan Premer-Mınıstr Kárim Másimov qatysqan bolatyn. Osy alqaly jıyn jaıynda kólemdi maqala jarııalaǵan «Egemen Qazaqstan» gazetiniń jazýynsha, Úkimet basshysy forýmnyń ashylýynda sóılegen sózinde Elbasy Nursultan Nazarbaevtyń Qazaqstan halqyna Joldaýynda jarııalanǵan tapsyrmalardy oryndaý mańyzdylyǵyn aıryqsha atap ótken. Sonymen qatar forýmda elimizdiń Ulttyq ekonomıka mınıstri Erbolat Dosaev baıandama jasady. Ol óz kezeginde Ekonomıkalyq yntymaqtastyq jáne damý uıymynyń Qazaqstanǵa arnalǵan eldik baǵdarlamasyna jýyrda qol qoıylatynyn habarlady. Maqala «Memlekettik basqarý reformasynyń mańyzy zor» degen taqyryppen berilgen.
«Keshe Ortalyq kommýnıkatsııalar qyzmetinde Mańǵystaý oblysynyń ákimi Alık Aıdarbaev brıfıng ótkizdi. Onda óńirdiń áleýmettik-ekonomıkalyq damýy men memlekettik jáne salalyq damý baǵdarlamalaryn júzege asyrý barysy jóninde áńgimelep, tilshilerdiń aımaqqa qatysty qoıǵan suraqtaryna jaýap berdi», - dep jazady «Egemen Qazaqstan» gazeti senbilik nómirindegi «Munaıly Mańǵystaýdyń mártebesi bıik» degen taqyryptaǵy maqalasynda. Oblys ákiminiń sózi boıynsha, onda balabaqshanyń jetispeýshiligi týý kórsetkishiniń joǵary bolýynan týyndap jatqan kórinedi. «Mańǵystaý oblysy halyq sanynyń ósimi joǵary óńirge jatady. Búginde ólkemizde 600 myń adam turady, ótken jylmen salystyrǵanda turǵyndar sany 103,4 paıyzǵa artty. Mundaı ósim qarqyny eń birinshi kezekte týý kórsetkishiniń joǵary bolýymen baılanysty. Oǵan qosa, basqa óńirlerden kelýshilerdiń sany boıynsha da aldyńǵy qatarǵa shyǵyp, mıgratsııalyq ósim 2 myń adamdy qurady. Halyq sanynyń osylaısha ósim qarqynyna ıe bolýy bizge áleýmettik máselelerdi jedel sheshý, adamnyń turmys-tirshiligine qajetti ári mańyzdy sanalatyn ınfraqurylymdardy damytý mindettemelerin júkteıdi. Bıyl áleýmettik salaǵa 72 mlrd. teńge bólindi. Bilim berý salasyndaǵy «Balapan» baǵdarlamasy 3-6 jastaǵy balalardyń 82 paıyzyn qamtyp otyr. Jalpy, balabaqshalarda oryn jetispeýshiligi negizinen týý kórsetkishiniń joǵary bolýymen baılanysty bolyp tabylady. Búgingi tańda 10 myńnan astam bala kezekte tur», - dedi A.Aıdarbaev. *** Elimizdegi turǵyn úı ınfraqurylymdaryn nyǵaıtý máselesine Elbasy Nursultan Nazarbaev «Nurly jol» - bolashaqqa bastar jol» atty Joldaýynda toqtaldy. Biz osy rette «Aıqyn» gazeti qarjyger Ǵalym Baınazarov myrzany áńgimege tartyp, oı bólisken. Basylym tilshisiniń Elbasynyń bul bastamasy eldi baspanamen qamtamasyz etýge tyń serpin bere ala ma degen saýalyna jaýap bergen ol: «Mindetti túrde. Birinshiden, soma qomaqty. Bul - dollarǵa shaqqanda 1 mıllıard dollardyń kólemindegi qarajat. Ekinshiden, eger osyndaı soma Úkimet tarapynan bólinip jatsa, ekinshi deńgeıdegi bankter de qarap otyrmaıdy. Olar qazirdiń ózinde nesıe berip jatyr, olardyń umtylystary burynǵydan da arta túsedi. Elbasymyz óte jaqsy usynys jasady. Ol «Úkimetke baǵynatyn nesıe ınstıtýttary - Qazaqstannyń turǵynúıqurylysjınaq banki, Qazaqstan ıpotekalyq kompanııasyna Úkimetten bólinetin nesıelerdiń jyldyq paıyzy kóp bolmaýy kerek, anyǵy 1-2 paıyzdan aspaýy tıis», - dedi. 2 paıyz bolmaı-aq, tipti 3 paıyzdan alsa da bul óte úlken jetistik bolar edi», - deıdi. Suhbat «Úkimet te, Ulttyq bank te durys kózqaras tanytýy kerek» degen taqyryppen berilgen.
«Ońtústiktiń shyǵysqa kóshi bastalmaq. Ońtústik oblystardan myńǵa jýyq otbasy Shyǵys Qazaqstan oblysyna qonys aýdarmaq. Ońtústiktegi jumyssyz júrgen azamattardyń shyǵysqa baryp, óz jaǵdaıyn jasaýyna múmkindik týyp tur. Onyń da sebebi bar. Shyǵystyqtar pedagog, tehnık, aýyl sharýashylyǵy mamandaryna tapshy. Ári bilikti memlekettik qyzmetkerler de jetispeıdi», - dep jazady «Aıqyn» gazeti senbilik sanyndaǵy «Ońtústikten shyǵysqa aǵylǵan kósh jalǵasa ma?» degen taqyryptaǵy maqalasynda. Basylymnyń jazýynsha, Jaqynda ishki kóshi-qon máselesine baılanysty árbir óńirdiń basshylary arasynda kelisim jasalyp, arnaıy baǵdarlama túzildi. Bul baǵdarlama negizinde ońtústik óńirden qonys aýdarǵandarǵa baspanalar berilip, arnaıy sýbsıdııa bólinbek. Árıne, shyǵysqa barýshylardyń erki ózinde. Qolynda qujaty bar kez kelgen azamattyń shyǵysqa bet túzeýine bolady. «Kez kelgen azamattyń «ShQO-ǵa qonys aýdaramyz» baǵdarlamasymen tanysqysy kelse, Shyǵys Qazaqstan oblystyq jumyspen qamtý jáne áleýmettik baǵdarlamalar bóliminiń saıtyna kirip, elektrondy kartany qaraýyna bolady. Jergilikti turǵyndar aspazdardy, tehnıkterdi, aýyl sharýashylyǵy mamandaryn qabyldaýǵa ázir», - dep jazady maqala avtory. *** «Alǵash ret kezdesýge kelgen jigitine 8 aılyq qyzyn «syıǵa» tartqan kelinshek Pavlodarda qolǵa tústi», - dep jazady «Ekspress K» gazeti búgingi nómirindegi «Dochka nevozvrata» degen taqyryptaǵy maqalasynda. Basylymnyń jazýynsha, ol osy ýaqytqa deıin avtobekette turyp kelgen. 19 jastaǵy Aısulý kezdesýge kelgen jas jigitke balasy men onyń kıimderi salynǵan paketin tastap qashyp ketken. Osydan keıin jigit polıtsııaǵa shaǵymdanǵan. Balasyn tastaı qashqan kókek ana qolǵa túsken soń mundaı qadamǵa qarjylyq problemalarǵa baılanysty barǵanyn aıtqan. «Ol esh jerde jumys istemeıdi. Jyldan astam ýaqyt buryn jumys tabý úshin Pavlodar oblysynyń aýyldyq jerinen qalaǵa kelgen jáne osy jerde qyzyn dúnıege ákelgen. Qazirgi ýaqytta balanyń ákesi jaıynda esh aqparat joq. Quqyq qorǵaý organdarynyń qyzmetkerleri áıelmen túsindirý jumystaryn júrgizýde», - dedi Pavlodar oblystyq ІІD-niń baspasóz hatshysy Baıan Maǵzumova.