Ońtústikten maqta talshyǵy Chehııa men Úndistanǵa eksporttalady

ShYMKENT. QazAqparat - Bıyl maqtaraldyq «Myrzakent» maqta tazalaý zaýyty maqta talshyǵyn daıyndaýda rekordtyq kórsetkishke qol jetkizýi múmkin. Bul mejege jetý úshin kásiporynǵa AQSh-tyń «Lıýmýs Korporaıshn» kompanııasynan satyp alyp ornatqan qondyrǵysy kómektespek. Óńirdegi maqta zaýyttarymen salystyrǵanda bul óndiristiń eńbek ónimdiligi 30 paıyzǵa joǵary, dep habarlaıdy oblys ákiminiń baspasóz qyzmeti.

Atap aıtqanda, qondyrǵydan talshyqtyń shyǵýy 30 paıyzǵa artyq ári sapasy joǵary, elektr qýatynyń shyǵyny 25-30 paıyzǵa únemdeledi jáne maqtany óńdeý merzimi 30 paıyzǵa qysqarǵan.  Jobada paıdalanylǵan ınnovatsııalyq tehnologııalar TMD elderinde teńdesi joq óndiris bolyp tabylady. 

«Maqta zaýytymyzdaǵy ınvestıtsııalyq joba 2013 jyly óńirlik úılestirý keńesinde (ÓÚK) maquldanyp, ındýstrıaldy kartaǵa eńgizilgen bolatyn. Sóıtip, atalmysh jobany 2014 jyly iske qostyq. Búginde zaýyttyń jalpy quny 1 mıllıard teńgeni quraıdy. Munda 120 adam merzimdi jumys ornymen qamtylǵan», - deıdi zaýyttyń bas ınjeneri Asylbek Jamalov.  

2014 jyly «Údemeli ındýstrıaldy-ınnovatsııalyq damý» memlekettik baǵdarlamasy aıasynda iske qosylǵan kásiporyn bıyldyń ózinde 60 myń tonna maqta talshyǵyn ázirleýdi josparlap otyr. Táýligine munda 40 tonna maqta talshyǵy óndiriledi. Daıyn ónim Shymkenttegi maqta toqyma zaýytyna jóneltiledi. Zaýyt qajettiliginen artylǵan talshyqtar Chehııa men Úndistan memleketterine saýdalanady.

Osylaısha «Myrzakent» JShS maqtany ósirip qana qoımaı ony qaıta óńdeý isimen de aınalysyp jatyr. Sondaı-aq, bul kásiporyn óńir maqtashylarynan tıimdi baǵada aq altyn qabyldap, qambasyn shıkizatpen toltyrýda.